“Ho laran susar, ha’u deside promulga Dekretu Orsamentu Jerál Estadu ida ne’e.....,dekretu foun ida ne’e hetan interasaun de’it,  iha ninia montante,”PR Lú Olo deklara nia rajaun kona-ba promulgasaun dekretu Parlamentu Nasionál númeru 5/V OJE 2019, iha Pallasu Prezidensiál, Bairru-Pité, Dili, Segunda (11/02).

Ho laran susar, PR Lú Olo espresa nia sentimentu katak obrigasaun ida nu'udar aman ba nasaun no povu nia tenke promulga orsamentu ne’e hodi benefisia ferik no katuas sira, ba bolsa da mãe, ba merenda escolar, veteranu no sidadaun sira ne’ebé simu transferénsia públika.

Aleinde ne’e, Xefe Estadu promulga mós tanba hakarak fó dalan ba Governu selu lalais   tusan Estadu nian ba setór privadu hodi nune’e, Governu  onra kompromisu Estadu nian ho setór ne’ebé ajuda haburas ekonomia no moris di’ak povu nian.

Tanba ne’e Xefe Estadu fiar katak hotu-hotu iha devér atu prepara ba futuru,  prepara kondisaun moris di’ak ba jerasaun aban-bainrua nian,  husi lala’ok ka komportamentu ne’ebé hala’o ohin loron.

“Prezidente Repúblika, ha’u apela fila fali. Ba Orsamentu Jerál Estadu ba tinan 2020, ita sei haree hamutuk, oinsá investe iha rekursu renovável sira, rekursu ne’ebé ita bele uza babeibeik no oinsá investe iha área oioin atu hasa’e moris-di’ak no haburas ita-nia sosiedade,”hatutan nia.

Nia hato'o tan katak oinsá aloka osan hosi orsamentu ba tinan hirak tuir mai,  atu labele hali'is liu ba dezenvolvimentu infraestrutura no hamenus osan ba dezenvolvimentu umanu.

Ho investimentu ne’ebé halo ho osan hosi Orsamentu Jerál Estadu, tenke hetan  retornu sosiál no ekonómiku aas, fó prioridade liu-liu  ba kapitál umanu, edukasaun, saúde no atividade produtiva, hanesan agrikultura no mós empregu.

Tanba ne’e, Xefe Estadu husu ba distintus Deputados iha Parlamentu Nasionál atu halo desizaun ba OJE ho ekilíbriu no sustentável ba futuru. Ba Governu atu investe osan iha rai laran liu husi medida polítika no lejizlativa hodi garante katak sei taka défisit finanseiru iha tinan hira tuir mai. Nune’e, sei la hasai tan osan Fundu Mina-rai liu Rendimentu Sustentável Estimadu.

“Nu’udar Prezidente Repúblika, ha’u uza ha’u nia kompeténsia rasik atu promulga ka veta OGE 2019. Veta atu hadi'ak, promulga atu ezekuta ba povu nia nesesidade sira ne’ebé ita hotu defende,” tenik nia.

Entretantu Kinta-feira kotuk, loron 7 fulan-Fevereiru, Prezidente Repúblika promulga Dekretu foun husi Parlamentu Nasionál kona-ba Orsamentu Jerál Estadu 2019.

Presidente Repúblika veta Dekretu dahuluk, ho totál orsamentu dolar biliaun $2.132, no Dekretu foun promulgadu tuun ba dolar amerikanu biliaun $1.482.

Entretantu tuir sosiedade sivíl sira katak orsamentu estadu ne’ebé promulgadu bele normaliza situasaun povu nian liuliu iha aérea edukasaun, saúde, turizmu, agrikultura no infraestrutura.

Tuir Diretór Ezekutivu Luta Hamutuk, José Alves hatete, orsamentu ne’ebé promulgadu bele normaliza ona situasaun ekonómiku rai laran, maibé presiza nia efetividade ezekusaun. Tuir nia haree katak membru Governu na’in sia (9) ne’ebé seidauk hetan pose ba ministériu balun ne’e sei difikuldade boot.

Tanba ne’e, Primeiru Ministru tenke buka maneira halo komunikasaun ho Presidente Repúblika hodi bele solusiona membru governu na’in sia ne’e.

“Ou tenke troka atu nune’e labele hatudu arrogánsia polítika hodi fó presaun ba malu, e povu mak sai vítima ita haree ona iha tinan kotuk liu ba,”dehan Diretór Luta Hamutuk.

OJE 2019 ne’e, tuir Ministru Reforma Lejislativa Asuntu Parlamentarés, Fidelis Leite Magalhaés hatete, semana oin hahú ezekuta ona.