Presidente Repúblika Francisco Guterres Lú Olo hatete, lista pendente kandidatu membru Governu ne’ebé too agora seidauk hetan pose ne’e kompeténsia Primeiru Ministru.

“Membru governu ne’e kompeténsia governu nian, kompeténsia Primeiru Ministru nian atu hili se de’it mak atu sai membru Governu,”dehan PR Lú Olo ba jornalista sira hafoin remata kuda ai-oan iha Palasiu Nobre Lahane, Dili, Sesta (08/02).

Entretantu, Primeiru Ministru Taur Matan Ruak liu husi nia porta-voz no Ministru Reforma Lejizlativa Asuntu Parlamentár (MRLAP), Fidelis Leite Magalhães hatete,

PM Taur seidauk iha planu atu troka lista kandidatu pendente tuir ezijénsia Xefe Estadu nian.

Ho situasaun ne’e, Fidelis akresenta, Xefe do Governu kontinua mantein lista pendente atu kompleta estrutura VIII Governu.

“Ita nia Primeiru Ministru rasik seidauk iha hanoin ruma atu altera naran sira antes ne’e aprezenta tiha ona, nune’e Xefe do Governu mós ezije ba Prezidente da Repúblika atu fó tomada de pose,”dehan Fidelis ba jornalista iha Palásiu Governu Dili, sesta (8/2).

Relasionadu ho situasaun ne’e, Xefe do Governu Taur Matan Ruak rasik kontinua halo diálogu ho Xefe Estadu nune’e kompleta lalais liña ministériu balun daudaun ne’e sei mamuk.

Ideia diálogu ne’e hetan apoiu husi partidu opozisaun atu bele solusionadu lista membru Governu pendente ne’e.

Prezidente Partidu Demokrátiku, Mariano Assanami Sabino husu ba Prezidente Repúblika, Francisco Guterres Lú Olo atu tuur hamutuk ho Primeiru Ministru, Taur Matan Ruak hodi buka solusaun.

Tuir nia katak, Primeiru Ministru no Presidente Repúblika tenke hahú diskute ona kona-ba lista ne’e, tanba la rezolve sei difikulta funsionamentu estadu ne’e nian.

Assanami hateten, orsamentu promulgadu ona maibé membru governu ne’ebé atu jere ministériu sia mak laiha ne’e fó impaktu makaas tebes ba desizaun hodi ezekuta orsamentu ne’e rasik.

“Labele ko'alia polítika barak liu maibé povu terus hela, ha’u hanoin laiha razaun atu tunda tan tenke tuur hamutuk diskute semak di’ak liu atu bele enxe atu governu bele la’o ba oin,”dehan nia iha PN.

Assanami fiar ba Presidente Repúblika PR no Primeiru Ministru sira sei tuur hamutuk hodi rezolve situasaun polítika ida hodi bele garantia Governu ida ne’ebé estavel no kualidade ba implementasaun programa no ezekusaun orsamentu tuir nesesidade povu nian.

Iha fatin hanesan, tuir Vise Presidente Bankada FRETILIN, Francisco Branco hatete, ba kandidatu membru Governu na’in sia ne’ebé seidauk simu pose ne’e kompeténsia PR Lú Olo ho PM Taur Matan Ruak.

“Atu buka solusaun ba ida ne’e kompeténsia PR no PM nian,”dehan nia iha PN.

Prezidente Repúblika rejeita membru Governu na’in sia ne’e no husu Primeiru Ministru nian impoderamentu ba membru Governu atu haree didi’ak no tetu molok fó pose.

Kandidatu na’in sia ne’e, na’in rua mak rezigna an ona mak António Verdial (kandidatu ba Ministru Interiór) husi partidu KHUNTO no Xanana Gusmão (kandidatu ba Ministru Planeamentu Investimentu e Estratéjiku, husi partidu CNRT.