Apoiu ne’e oferese liu husi ligasaun kooperasaun ne’ebé kria husi Eis Sekretáriu Estadu Polítika Formasaun Profisionál Empregu (SEPFOPE), Ilídio Ximenes da Costa hahú kedas iha tinan 2015 liubá.

Atuál Membru Bord  Xanana Reading Room, Ilídio Ximenes da Costa esplika apoiu ne’e la’ós foin primeiraves, maibé iha tinan 2015 liubá bainhira asume kargu Sekretáriu Estadu iha VI Governu Konstitusionál nia tempu, Ilídio hala’o vizita ba Koreia hodi kria ona kooperasaun ho Autoridade Gwangju Metropolitan City hodi oferese uluk ona komputadór inklui kadeira no meza no mikroskópiu hodi fó ba Eis Prezidente Repúblika, Taur Matan Ruak hamutuk ho SEPFOPE  fahe ba eskola sira ne’ebé menus kadeira no meza.

Apoiu ne’e mós nu’udar programa kooperasaun entre povu Timor-Leste no Povu Koreia inklui Governu Timor-Leste no Governu Koreia.

“Apoiu ne’e Gwangju Metropolitan City fó liu husi kooperasaun ne’ebé ha’u kria entre povu ho povu no governu rua hodi oferese meza ho komputadór 145 inklui kadeira no meza hamutuk 1.900 inklui mikroskópiu iha tinan 2015 liubá agora sira fó  tan komputadór 50,” dehan Ilídio ba jornalista iha salaun Xanana Reading Room, horiseik.

Tuir nia, Povu Koreia ho ninia setór privadu inklui kompañia jigante sira fó apoiu ne’e hodi tulun di’ak liután juventude sira atu tuir formasaun bele uza fasilidade hirak ne’e.

Apoiu ne’e agora oferese fali ba Xanana Reading Room hodi fó apoiu ba juventude sira tuir formasaun iha área oin-oin.

Tuir planu, Autoridade Gwangju Metropolitan City mós sei kontinua haruka ekipamentu meza kadeira no komputadór hodi fó ba Xanana Reading Room iha tempu besik.

Programa seluk tan maka, Autoridade Gwangju Metropolitan City hakarak fó apoiu bolsu estudu ba juventude Timoroan sira ne’ebé iha inisiativa hakarak kontinua sira nia eskola.

“Sira hakarak oferese mós bolsu estudu ba joven Timoroan sira ne’ebé inan aman moris mukit,” nia hatete.

Lansa Asosiasaun Koreia & Timor-Leste  

Entretantu, Ilídio dehan, tuir planu iha tempu besik, Lider Karizmátiku, Kay Rala Xanana Gusmão sei hala’o vizita ba Koreia hodi halo lansamentu  Asosiasaun Koreia & Timor-Leste  ne’ebé envolve mós eis membru governu, deputadu iha Koreia no Eis Sekretáriu Jerál ONU, Banki Moon.

“Tempu besik Maun Xanana iha fulan Outubru sei ba Koreia halo lansamentu Asosiasaun Koreia & Timor-Leste iha Koreia,” katak nia.

Asosiasaun ne’e kria hodi hametin kooperasaun entre povu rai rua inklui governu ho governu hodi fó apoiu ba malu iha área no setór oin-oin.

Fatin hanesan, Diretór Xanana Reading Room, Gaspar Quintino Freitas, hato’o agradese ba Autoridade Gwangju Metropolitan City hodi tulun difikuldade ne’ebé sira hasoru.

Nia dehan, komputadór sira ne’e sei fó apoiu ba juventude, estudante sira ne’ebé tuir formasaun iha Inglés, Portugés inklui formasaun kona-ba treinamentu date base SPSS no formasaun seluk tan.

“Ami agradese ba Gwangju Metropolitan City  hodi tulun ona ami nia difikuldade hodi fó apoiu ba programa formasaun ne’ebé ami halo ba juventude sira,” katak nia ho agradese.

Ba oin, sira sei uza komputadór 50 ne’e hodi koloka komputadór 10 fasilita joven asesu ba ínternet hodi estuda siénsia ne’ebé importante ba joven sira nia presiza atu sai matenek.

Alende ida ne’e, komputadór balun sei apoiu ba sentru sukursál Xanana Reading Room iha kada munisípiu hodi instala sala biblioteka no asesu ba ínternet no formasaun seluk tan.

Durante ne’e Xanana Reading Room kontribui makas iha área edukasaun hodi fó formasaun joven ne’ebé kada loron vizita ba sira nia fatin hodi aprende siénsia oin-oin.

Salaun Xanana Reading Roo hahú ninia servisu iha fulan Juñu 2000, funda husi, Kristy Sword Gusmão. Organizasaun ne’e hamriik atu serbi komunidade sira ne’ebé presiza liu informasaun, koñesimentu, literatura no edukasaun.

Nu’udar organizasaun ne’e legaliza tiha ona ho Ministériu Justisa iha loron 22 Janeiru 2015, Númeru Rejistu 239/DNRNMJ/IV2015. SLXG durante ne’e, hala’o duni ninia papél prinsipál iha promove aprende laiha-rohan (life-long learning) no nu’udar fatin seguru ba ema hotu atu hetan informasaun, koñesimentu, lee no impresta livru, inklui muzeu ne’ebé bele oferese informasaun kona-ba Xanana no ninia luta ba Timor-Leste independente

Fasilidade sira mak oferese iha SLXG mak hanesan biblioteka, muzeu, livru no loja livru, ínternet, sala audiovizuál, jornál média lokál kada loron, Bebeteca – biblioteka ba labarik sira no espasu ba enkontru no programa edukativu sira.  SLXG hala’o programa oioin ba pre-eskolár, estudante no joven sira nune’e mós eventu no espozisaun oioin.