Tuir Xefe Estadu, relasaun Timor-Leste ho nasaun seluk iha mundu, hotu-hotu importante, tanba estabelesimentu relasaun diplomátika, tuir nesesidade ne’ebé analiza ona.

“La iha nasaun ida mak importante liu, ladún importante ba Timor-Leste, iha nasaun ne’ebe ita estabelese ita-nia embaixada, tanba fó dalan ba ita, nesesidade analizadas husi instituisaun estadu oi-oin, ho nasaun balun, ita iha relasaun beibeik, intense iha área diplomatika, komérsiu, kultural no seluk tan, iha relasaun bilateral ativa seluk,”hatete Xefe Estadu, iha komunikadu ne’ebé Online INDEPENDENTE sita.

Ramos Horta haktuir, Reinu Unidu importante ba Timor-Leste, tanba apoia dezde okupasaun Indonezia no iha periódu ukun rasik-an.

“Reinu Unidu ne’e importante liu-ba Timor-Leste, membru permanente husi konsellu seguransa, membru ida husi nasaun G7 no nasaun ida ne’ebe mak ita sempre iha relasaun, iha momentu luta, ita iha movimentu soliedariedade boot, sosiedade sivil, husi Parlamentu, husi relasaun exterior, mundu akadémiku no mos husi mídia, tanba filme balun muda opiniaun públika Europa nian kona-ba timor, realiza husi televizaun Británika no órgaun imprensa,” fundamenta Xefe Estadu.

Xefe Estadu mós husu ba Embaixadór João Paulo da Costa Rangel, atu tau-matan ba Timor-oan liu rihun 30 ne’ebé dadaun ne’e hela iha Inglaterra.

“Obrigasaun ita-boot señor embaixadór mak, oinsá ita bele apoia di’ak liu-tan Timor-oan sira hodi haruka ba sira nia família, oinsá iha Timor-leste dala ruma ho BNCTL, loke programa espesiál ba Timor oan sira iha rai liur, iha Inglatera no seluk-tan, iha Correia do Súl, atu labele sai vítima, ba koberansa husi ajensia balun iha transferénsia osan,” tenik Xefe Estadu.

Entretantu, bá Prezidente Repúblika, relasuan ho Reinu Unidu, tenke efikaz , profisioonal, integridade no kompetente liu-tan, hodi promove Timor-Leste nia naran.

Tanba ne’e, Xefe Estadu hakarak kontinua diálogu intense ho Reinu Unidu, ho delegasaun ida ne’ebé sei mai iha Timor-Leste iha inísiu fulan Abril.

“Ita hakarak hametin liu-tan relasaun ho Reinu Unidu, relasaun bilateral ho Reinu Unidu tenke atinji patamar balun, diálogu akontese ona, ho delegasaun iha relasaun exterior no embaixada Reinu Unidu iha Jakarta, delegasaun ida sei mai iha ne’e, semana dahuluk ka daruak fulan Abríl, hodi kontinua diálogu,” Tenik.

Enkuantu, Embaixadór João Paulo da Costa Rangel promete exerse ninia kna’ar ho responsabilidade, hodi tane-a’as interesse nasional.

“ Ha’u Jura dezempeña funsaun espesiál ne'ebé mak atribui mai ha’u ho izensaun másima, dedikasaun no responsabilidade, tau interesse estadu a’as liu, duke konsiderasaun seluk, no sempre tuir prinsipiu ne’ebé fó dalan ba relasaun internasionál, husi atividade, relasaun internasionál, tuir konvensaun Vienna kona-ba relasaun diplomátika no relasaun konsulares” Promete Embaixador João Paulo.