PR Horta hatete, iha ninia vizita ba Xina, nia koalia naruk ho Prezidente Xina nian, haree oinsá atu aumenta liu tan kolaborasaun Timor-Leste ho Xina.
“Iha Xina hasoru ho Prezidente Xina nian, entidade lubuk ida, atividade ne'ebé di'ak tebtebes, ko'alia naruk ho Prezidente Xina nian, haree oinsa atu aumenta liu tan kolaborasaun Timor-Leste ho Xina,” dehan PR Horta iha aeroportu Internasionál Nicolau Lobato Dili, Domingu (04/08).
Tuir nia, relasaun ne’ebé TL ho Xina iha di’ak no metin. Xina sempre apoia TL desde tinan 20 nia laran.
Iha ninia vizita ba Vietnam, PR Horta dehan, nia mós koalia oinsa atu responde ba ninia preokupasaun boot kona-ba seguransa alimentar, sub-nutrisaun, no bee-moos iha Timor-Leste .
“Ne'e mak ha'u-nia preokupasaun boot liu, oinsa bele apoia Timor-Leste maka'as liu, atu bele rezolve tinan lima nia laran ne'e problema agrikultura, problema sub-nutrisaun, hamate tiha problema boot kiak ne'ebé maiória povu Timor sei halerik ida ne'e,” dehan nia.
Sira, PR Horta dehan, responde di'ak, no fiar katak iha tempu badak sei mai haree.
“Klaru buat sira ne'e hotu-hotu sei liu husi governu, relasaun bilaterál ne'e governu mak halo jestaun,” dehan nia.
Entretantu, vizita PR Horta nia viajen ba Xina no Vietname ne'e akompaña husi Vise Primeiru Ministru, Francisco Kalbuadi Lay; Sekretáriu Estadu Komunikasaun Sosiál, Expedito Dias Ximenes; Ministru Agrikultura, Pekuária, Peska no Floresta, Marcos da Cruz; Xefe Estadu Maiór F-FDTL, Tenente Jenerál Falur Rate Laek; Eis Xefe Estadu Maiór Jenerál, Lere Anan Timur; diplomata balun MNEK nian; no embaixadór iha Beijin no Vietname.
