Diretora ESTV Bekora, Bendita de Almeida hatete, ESTV esiste tinan barak ona ne’ebé hahú husi 2002 to’o agora, no iha estudante husi ESTV mos balun sai ona membru governu, maibé nafatin falta rekursu humanu no fasilidade sira.
“GTI eskola indústria ne’ebé tinan barak ona eziste, barak mak sai ona governante maibé ami-nia eskola nia preokupasaun mak ne’e ami falta de rekursu, ami falta de fasilidade ida ne’e mak presiza haree,” dehan Diretóra liu husi diskusaun Programa TLCE Ema Hotu Ba Edukasaun iha estúdio II Indepedente, Hudi-Laran Bairo Pite, Sesta (02/08).
Nia dehan, dadaun ne’e rekursu humanu sufisiente hela maibé presiza aumenta tan tanba eskola ne’e halai liu ba indústria, atu halo inovasaun ba buat ruma tanba ne’e sira presiza tebes rekursu.
Diretora salienta, fasilidade ne’ebé sira presiza la’ós halai ba meza ho kadeira, maibé ba sasán prátika, tanba iha eksola refere iha teoria nune’e mós ho prátika, nomós kuríkulu ne’e uza sistema modular, ne’ebé banhira teoria hotu estudante sira tenki hala’o prátika.
“Tanbasá mak ESTV tenki prátika, tanba prátika atu prepara ema ba iha kampu de traballu. Ne’ebé ami husu tebes ba iha governu bele tau matan mai ESTV iha Timor laran tomak, tanba ESTV nia preukupasaun iha Timor laran tomak mak hanesan ajuda ami iha rekursu umanu iha área ne’ebá no ho fasilidade ida la’os halai ba iha meza ho kadeira maibé fasilidade ba prátika ofisina,” nia hatutan.
Eis Prezidente Komisaun G husi Parlamentu Nasionál, Deputadu António Verdial hatete, hanesan reprezentante povu iha Parlamentu  Nasional sempre hakilar no ko’alia kona ba problema edukasaun nian, nune'e fó solusaun ba governu  atu tau lalais prioridade no rezolve lalais problema edukasaun nian.
ESTV Becora iha departamentu neen hanesan, Mekánika Automóvel, Mekánika Produsaun, Elektrónika, Eletrisidade, Konstrusaun Sivil no Informátika.