Xefe Estadu nia intensaun lori autoridade lokal ne’e atu bele haree besik liu tan dezenvolvimentu iha nasaun rua ne’e nune’e bele mai aplika mós iha Timor-Leste.
PR Horta dehan, ninia vizita ba Xina no Vietname ne’e importante tebtebes ba relasaun bilateral.
Delegasaun ba vizita estadu ne’e, nia dehan, sei konvida mós seitór privadu ho autoridade lokal sira.
“Konvida mós ema balun simples hanesan Xefe Aldeia, Xefe Suku, Timor-oan balun akompaña, ne'e mak sai husi Timor iha 27 (Jullu), fila 4 Agostu," informa Xefe Estadu ne’e.
Molok ne’e, maske iha kritika balun ba Prezidente Repúblika, José Ramos Horta, ne’ebé hala’o viajen ba rai li’ur, maibé ba Primeiru Ministru, Kay Rala Xanana Gusmão, ida ne’e nu’udar aktu ida atu lori Timor-Leste ba mundu.
PM Xanana hatete, kada Kinta nia sempre halo enkontru ho Xefe Estadu, maibé iha semana kotuk la konsege realiza enkontru tanba PR Horta hala’o viajen ba rai li’ur.
“Tan ne’e fó parabéns ba Prezidente Repúblika tanba buat hotu la'o di'ak iha ne’eba no Prezidente Repúblika mós sei ba fali Xina, atu lori nafatin ita-nia rain ba iha mundu.”
“Ho objetivu katak atu fó hatene ba mundu tomak katak ita la'o di'ak hela, ne’e duni ida ne’e hanesan komprimentus husi governu ba Prezidente Repúblika," dehan PM Xanana ba jornalista sira hafoin enkontru ho PR Horta iha Palasiu Prezidensiál Bairu-Pite, Kinta (18/07).
Molok ne’e, iha 2 Jullu 2024, Prezidente Repúblika, José Ramos Horta, ho delegasaun hala'o viajen ba Mozambike no Angola, no fila fali mai Timor-Leste iha 12 Jullu 2024.
Entretantu, tuir planu, iha 27 Jullu ne’e, PR Horta sei hala’o fila fali viajen ba Xina.
