Reklamante ida, Tiborcio Valeriano Pereira, husi Munisipiu Baukau, sente la satisfas ho rezultadu teste ne’ebé SEFOPE hasai iha 19 Jullu ne’e.
"Ha'u hakarak hato'o ha'u-nia reklamasaun ba ita-boot sira kona-ba rezultadu teste eskrita PALM ne’ebé hasai iha pajina ofisial SEFOPE. Depois haree rezultadu ezame eskrika ha’u la satisfas no la simu rezultadu teste ida ne'e," deklara Tiborcio liu husi email ba SEFOPE.
Reklamante ne’e kestiona SEFOPE nia kualidade hodi kurize foila ezame. Tanba nia hetan total score 20.
"Pesoal ne’ebé input ha’u-nia valor ezame ne’e input sala karik? Tanba rezultadu ne’ebé fó sai la tuir ha’u-nia koñesimentu,” dehan nia.
Nia hatutan, grupu ne'ebé ezame iha 17 Fevereiru, tuku 03:00 loraik, iha Zinajiu Baukau, ho total na’in 544, husi númeru ne’e na’in tolu de’it mak passa.
"Serake ami bele fiar rezultadu ida ne’e iha transparensia? ka ami hirak ne’e mak laiha kapasidade duni no laiha koñesimentu duni iha ezame eskrita lingua inglesh?," nia kestiona.
Nune'e, reklamante ne’e husu SEFOPE hatudu evidensia ezame no sadik atu koko abilidade ingles ou bele halo teste foun hodi hatudu kedas rezultadu.
"Lae, karik ha’u nunka mais atu fiar tan sistema transparensia iha vaga publiku iha SEFOPE ne’ebé nakonu ho Korupsaun, Koluzaun, Nepotizmu," deklara reklamante ne’e.
Relasiona ho reklamasaun ne’e, Komisariu KAK hatete, KAK konsidera ida ne’e no sei follow-up ba SEFOPE.
"Ha'u akompaña complain sira ne’e iha media sosial, maibé KAK hanesan instituisaun estadu nian ita labele rona de'it media sosial, maibé persiza konfirma ho ita nia sumber ne'ebe ita bele fiar, entaun persiza intervensaun husi sumber ne'ebé ita fi'ar katak ne’e validu, maibé informasaun iha media sosial mós persiza ita haree," dehan Rui iha Timor Plaza, Segunda (22/07).
Tuir nia, prosesu selesaun bá vaga Australia ne'e SEFOPE la'o tuir regras ne'ebé mak estabelese, maibé karik mosu irregulariedade ruma, KAK sei toma atensaun.
"Prosesu sira ne'e ninia lalaok no regras iha, kompaña sira ne’ebé atu fó servisu ema ne'e sira-nia ema mós mai, maibé se karik selesaun ka koreksaun ne’e la'o la loos, ha'u hanoin hanesan komisariu entermus jestaun sei ko'alia ho SEFOPE oinsa hadia sasan sira ne’e," katak nia.
Iha fatin hanesan, Diretór Ezekutivu FONGTIL, Valentim da Costa Pinto hateten, kada tinan bainhira SEFOPE loke vaga ruma, sempre mosu reklamasaun barak, nune'e desde uluk FONGTIL rekomenda atu halo selesaun ruma persiza tau ema independente, labele SEFOPE.
"Ne'ebé ami rekomenda ona katak, SEFOPE persiza tenke hadia prosesu selesaun sira ne'ebé ke halo, iha futuru persiza hadia mak tenke iha ekipa Independente ida ne'ebé ke bele halo avaliasaun kona-ba ema-nia aplikasaun sira hodi bele haree, labele iha ona tendensia familiarismu," nia dehan.
Tuir nia, irregulariedade mosu iha selesaun ba vaga ruma ne’e akontese kleur ona, maibé ladauk tau atensaun.
"Ha'u hanoin PDHJ ho KAK no Inspetur Jeral sira bele halo investigasaun ruma, tanba sa akontese beibeik, nune'e tempu to'o ona fó autoridade ba instituisaun estadu sira bele halo investigasaun bá erru," katak nia.
