Ministra MSSI, Verónica das Dores hatete, apoiu sosiál bá komunidade sira iha suku refere, tanba haree ba folin nesesidade bázika ne’ebé dadaun ne’e sa’e maka’as iha merkadu nomós mudansa klimátika ne’ebé afeita ba komunidade sira.
“Distruibuisaun ne’e la’os primeira véz maibe fatin-fatin mai la’o tiha ona tanba ita hare ba komunidade presiza duni no Ministeriu Solidariedade Sosial tenki apoiu, no haree katak bai-loron naruk ka mudansa klimátika no iha buat barak nesesidade bázika mós folin sa’e entaun ida ne’e Ministériu nia responsabilidade atu fó apoiu sosiál,” dehan Ministra iha Sede suku Mantelolão Metinaro, Tersa (23/07).
Governante ne’e hatutan, distribuisaun nesesidade bázika ne’e, ministériu halo ona iha fatin-fatin, maibé iha postu administrativu Metinaru foin realiza dala-ida.
Tan ne’e, Ministeriu halo distribuisaun bazea ba pedidu ne’ebé autoridade lokál sira submete.
“Maib’e distribuisaun ne’e iha fatin barak ne’ebé ami hala’o ona, e agora iha suku ida ne’e no ita sei ba tan fatin seluk, ita servisu no koordenasaun ho autoridade lokál, ministériu la naran halo distiribuisaun maibé distribuisaun bazeia ba pedidu ne’ebé autoridade lokál fó,” Ministra hato’o
Xefe Suku Mantelolão, Sergio Lopes Assis Dias, hato’o agradese ba governu Da-sia tanba bele apoia ona ai-han ba iha komunidade sira, liu husi dadus ne’ebé sira submete ba iha MSSI.
Xefe suku haktuir, la’os to’o iha ne’e de’it, maibé xefe suku sei identifika tan komunidade sira ne’ebé konsidera hanesan vulnerálvel, atu nune’e bele hetan hotu apoiu.
“Depois sira simu hotu, ita sei kontinua haree fila-fali família balun hodi identifika ida ne’ebé mak vulnerávél otomatikamente ita kontinua submete ba iha Diresaun Solidariedade Sosial Munispiu Dili atu kontinua tau matan ba sira,” dehan Xefe Suku.
Entertantu, apoia sosiál ne’ebé MSSI fó ba komunidade atus rua resin sira hanesan fós, mina, supermie, susuben, foremungu no seluk tan.