Xefe Suku Mantelão, Sergio Lopes Assis Dias hatete, nia parte preokupa tebes ho infrastrutura iha suku refere liliu estrada tanba dadaun ne’e kondisaun aat.
Nune’e, nia parte hato’o ona karta pedidu ba iha Ministériu Obras Públika atu tau konsiderasaun maibé to’o agora seidauk iha resposta.
“hanesan lideransa komunitariu preukupa tebes liliu liga ba infrastrutura tanba ne’e maki ta iha obrigasaun nafatin atu ba iha Ministériu Obras Públika para bele konsidera no tau matan ba iha ita-nia difikuldade liliu ba iha ita-nia estrada husi Metinaru Vila mai iha aldeia neen, ne’e” dehan Xefe Suku iha Sede Suku Mantelolão Metinaro, Tersa (23/07).
Suku Mantelolão iha aldeia neen hanesan, Besahe, Birahamata, Has-Laran, Lebetun, Manularan no Mantelolão.
Nia hatutan, ministériu tenki tau konsiderasaun ba estrada liu-liu bronzong atu nune’e bele asegura edifísiu públiku sira ne’ebé estadu konstrui ona inkliu komunidade sira-nia uma.
No komunidade ne’ebé pertense iha suku refere totál uma-kain hamutuk atus lima tolu (503) no habitante hamutuk rihun rua atus ida ualu nolu resin ida (2.181).