Prezidente Repúblika José Ramos Horta hatete, programa rejistu labarik ne’e importante tebes, ne’e direitu labarik sira nian Timor-Leste estadu direitu modernu, no demokrátiku ne’ebé implementa direitu labarik sira nian ne’ebé importante tebes.
“Program ida ne’e ita hotu hatene importante tebes ami uluk kiik úniku dokumentu ida kuandu moris semana ida liu tiha ba halo batizmu no hetan sertidaun batizmu, portantu estadu modernu, demokratiku estadu de direitu, implementasaun direitu ida ne’e labarik sira nia sidadaun nia importante tebes, ne’e duni parabéns ba governu ne’ebé inisia prosesu rejistu ba labarik sira,” dehan PR iha Jardin Infantil PR Aitarak-laran, Segunda (30/09).
Xefe Estadu mos hato’o agradese ba parseiru internasionál hanesan japaun ho australia ne’ebé ápoiu hmutuk ho doadór sira seluk ne’ebé sempre tau kestaun ba direitu labarik no feto sira.
Ministru Justisa, Sergio da Costa Hornai hatete, projetu rejistu movel ba labarik sira ne’e hahú husi fulan Outubru to’o Dezembru tinan ne’e.
Nia dehan, objetivu prinsipál husi projetu ne’e mak inan-aman sira tenki lori oan sira ba rejistu atu nune’e bele iha baze de dadus ne’ebé kompletu.
“objetivu prinsipal husi projetu lansamentu ida ne’e, Nai Prezidente fó tan mensanjem ida ho tan korajem ba inan-aman para bele lori sira nia kosok oan ba rejista ho finanlidade ida para nune;’e ita iha baze de dadus ida no espera katak to’o iha dezembru iha tinna ikus ninia ita bele iha rihun 15 benifisiariu mak sai sujeita bai ha rejista ne’e,” dehan MJ.
Governante ne’e hatutan, rejistu móvel ne’e la’os buat foun ida maibé banhira restaura independénsia iha 2002, hahú halo rejistu liuliu atu hatene Timor-Leste nia monografia, kapasidade nomós atu hatene planu sira hodi halo integrasaun ba moris di’ak labarik sira nian.
Nune’e iha tinan ida ne’e, MJ sei halo servisu makas hamutuk ho parseria liliu Japaun, Amerika no mos nasaun sira seluk ne’ebé hola parte ihaTL.
Reprezentante UNICEF iha Timor-Leste, Patrizia Digiovanni hatete, UNICEF apresia tebes ho doadór sira nia apoiu ne’ebé atu ajuda labarik sira iha Timor-Leste nia direitu importante no husu nafatin doador sira nia apoiu atu alkansa labarik sira nia direitu.
Entertantu, programa rejistu labarik ne’e sei hala’o uluk iha munisipiu lima hanesan, Ermera neebé sei hala’o iha Postu Administratvu Atsabe, Letefoho no Railaco, Munisipiu Likisa iha Postu Maubara no Bazartete, Munisipiu Baukau iha Postu Baguia no Kelikai, Munisipiu Vikeke Postu Uatulari, Lakluta no Ossu, enkuantu Munisipiu Dili sei hala’o iha Atauro.