“Ministra Elia tenke rekolla didiak dadus kona ba dividas iha singapura, malazia no indonezia hodi fó sai ba publiku,” dehan PM Xanana ba Jornalista sira iha Sala VIP, Aeroportu Internasional Nikolau Lobato, segunda (30/09/24).

Governu liu-hosi Reuniaun Konsellu Ministru (KM) iha loron 25 Setembru 2024, fó mós instrusaun bá Ministra Saúde atu halo levantamentu detalladu kona-ba dívida sira no prazu pagamentu, no mós verba  sira ne’ebé disponível atu realiza kompromisu sira-ne'e, ho objetivu atu rezolve pagamentu bá dívida ezistente bá ospitál sira iha rai-li’ur, no garante kontinuidade servisu saúde nian.

KM rekomenda bá Ministra Saúde tenke estabelese kritériu prioritizasaun bá pagamentu, bazeia bá urjénsia servisu, risku bá saúde públika no impaktu bá operasaun ospitál nian.

Entre medida sira seluk, Konsellu Ministru fó mós instrusaun bá Ministra Saúde atu hahú halo negosiasaun ho ospitál sira hodi re-estrutura dívida sira no propoin bá Ministériu Finansas reforsu orsamentu ida bá seitór saúde nian.

Implementasaun husi medida sira-ne’e, sei hetan monitorizasaun husi grupu traballu ida ne’ebé kria espesifikamente bá objetivu ida-ne’e, ne’ebé tenke aprezenta relatóriu periódiku sira bá Konsellu Ministru kona-bá progresu ne’ebé alkansa ona iha likidasaun dívida ospitál nian.