Totál kandidatu profesór na’in 2.441 mak pasa iha teste bolsa kandidatu refere, maibé Ministériu Edukasaun klasifika tuir seriesaun husi númeru 1 to’o 673.

Portavós Ministériu Edukasaun, Filipe Rodriguês hatete, kolokasaun ba Munisípiu Ermera hamutuk 219 tanba sira sei menus profesór iha eskola sira.

“Hosi totál dosente foun na’in-673 fahe hanesan tuir mai, kandidatu na’in 219 koloka iha Ermera, Bobonaru na’in 92, Likisa na’in 63, Manatuto na’in 48, Vikeke 43 no Ainaro na’in 42” dehan Portavóz liuhusi konferensia Imprensa iha Vila Verde (27/09).

Nune’e iha Munisípiu Aileu, Manufahi, Baukau, RAEOA hetan dosente foun hamutuk na’in 24-27 nune’e Covalimas imu na’in 16, Lautén na’in 10 no Díli na’in tolu.

Totál dosente foun na’in 673 ne’ebé koloka ba Munisípiu sira ne’e, pursentu 74 hosi kolokadu hetan kolokasaun iha munisípiu tuir sira-nia preferensia.

Planu polítika Ministériu Edukasaun halo xamada kolokasaun kandidatu hosi Bolsa Kandidatu profesores na’in 673, atu halo mudansa ba kualidade edukasaun iha iha teritóriu.

“Kandidatu iha lista 1 to’o 300, Ministériu Edukasaun konsege koloka na’in 283 tuir sira-nia preferiénsia,” nia esplika.

Nune’e, Ministériu Edukasaun sei asegura katak, eskola hotu hotu iha teritóriu toimak sei iha númeru dosente ne’ebé presiza hodi garante edukasaun ho kualidade.