Prezidente ANCI-TL, José Turki hatete, hanesan ema hotu hatene katak dala barak akontese iha Tomor-Leste kazu soe bebé la’os buat foun maibé hanesan fenómenu públiku ne’e ema hotu akompaña.
Nia dehan, hahú hosi trimestre dahuluk to’o trimestre datoluk ANCI-TL rejista kazu soe bebé hamutuk tolu hosi munisípiu tolu (3).
“Liga ba trimestrál ne’ebé aliansa rejista ita hahú hosi Janeiru to’o mai Setembro ita rejista kazu tolu,” dehan Prezidente ANCI-TL liu-hosi konferiénsia imprensa iha salaun FONGTIL Kaikoli, Sesta (27/09).
Prezidente ne’e afirma, durante fulan sia ne’e, munisípiu tolu ne’ebé sai autór ka kontribui maka’as ba iha kazu soe bebé mak Dili, Manufahi no Bobonaro.
Nia hatutan, prosesu kontinuasaun ba bebé ne’ebé ema deskoñesidu sira soe, iha suku hola rua, Postu administrativu Same Munisípiu Manufahi la konsege salva nia vida, tanba labarik isin sorin loos animál haan tiha, no hosi Maliana hanesan ema hotu akompaña inan oho tiha hafoin so’e iha mota no iha suku Komoro bebé ne’ebé soe iha lixeira dadun ne’e kondisaun di’ak hela.
“Entaun hahú hosi prosesu tolu ne’ebé mak ita rejistu iha Munisipiu Manufahi tuir informasaun ne’ebé ita hetan ita servisu hamutuk ho PNTL munisípiu no autoridade lokal sira hetan ona nia inan agora dadaun ha prosesu nia laran oinsá mak bele submete ba iha prosesu justisa nian,” dehan Prezidente.
Nune’e hosi kazu soe bebé ne’ebé kontinua akontese, ANCI-TL rekomenda ba Parlamentu Nasionál hanesan órgaun soberanu ida atu halo amandamentu bá kódigu penál artigu 142 ne’ebé ko’alia feto ka inan sira.
ACNI-TL mós rekomenda ba parte igreja liuliu leigu ka padre sira atu fó morál ka motivasaun ba jovem sira liuhosi homília ne’ebé bá joven sira atu nune’e labele akonstese tan kazu so’e bebé.