PR Horta: “Lalika temi bebeik Governu anterior nia Sala” Featured

By Ekipa INDEPENDENTE Abril 22, 2024 1233
Prezidente Repúblika, José Ramos Horta. Foto:Dok. Prezidente Repúblika, José Ramos Horta. Foto:Dok.

DILI: Prezidente Repúblika, José Ramos Horta, husu ba governu dasia ne’ebé lidera husi Primeiru Ministru, Kay Rala Xanana Gusmão, atu labele temi beibeik governu anterior nia sala.

Tuir PR Horta, governu dasia bele halo auditoria ba governu daualu. La'os atu buka de’it ninia sala maibé atu kurize no hadia.

“Nono governu halo imi-nia kna'ar. Ministru, Vise Ministru, Sekretáriu Estadu halo kna'ar, ezekuta governu nia programa, lalika ko'alia barak ba kotuk. Lalika temi beibeik governu anteriór nia sala. Auditória la'ós problema, bele halo auditória, tenke halo duni. Maibé la'ós atu buka sala ida ne'e nian la'e, haree auditória saida mak sala ita kurize,” dehan PR Horta liu husi ninia diskursu iha Kongressu Nasionál Partidu Khunto ba ba dala haat, ne’ebé halao iha salaun Delta Nova, Sábadu (20/04).

Molok ne’e, Governu Konstitusional dasia ne’ebé lidera husi Primeiru Ministru, Kay Rala Xanana Gusmão, konsidera foer ne’ebé governu Konstitusional daualu lidera husi, Taur Matan Ruak, barak tebes, tan ne’e sei labele dasa moos iha tinan ida.

PM Xanana deklara kestaun ne’e relasiona ho pergunta kona-ba avaliasaun dezempeñu ba ninia membru governu sira.

“Susar atu responde. Ha'u temi tiha ona ida ne'e, maibé ha'u hakarak repete fila fali katak governu ida ne'e atu servisu loloos só iha 2025. Tanba buat sira ne’e agora…. loron ida ami hanoin katak fó hanoin uitoan, mais foer ne'e barak liu fali lixu ne'ebé agora iha Dili ne'e. (governu dasia) hamoos, hamoos, sei halo auditória. Agora ne'e mak sei halo kuotasaun, ami estuda hela oin nusa atu fahe kazu sira ba auditória ne'e fahe ba rua, tanba la'e lori tinan ba tinan tanba buat barak,” dehan PM Xanana Gusmão hafoin enkontru semanál ho Prezidente Repúblika, José Ramos Horta, iha Palasiu Prezidensiál Bairu-Pite, Kinta (04/04).

Xefe Governu ne’e fó ezemplu ida kona-ba problema merenda eskolar.

Nia dehan, iha problema barak iha merenda eskolar ne’ebé governu dasia tenke rezolve.

“Tanba merenda eskolar governu anteriór dehan eskola tenke iha konta bankária, ne'ebé iha fatin balun labarik sira la simu merenda eskolar tanba osan sai ema balun sosa karreta ho osan konta bankária.”

“Semana-semana imi husu avaliasaun ba membru governu sira oinsa? mais semana-semana mós hatan katak governu sei hamoos, sei hadia foer iha… enkuantu ida ne'e husu ba Ministra Edukasaun merenda eskolar nusa? La'e, merenda eskolar agora ho MAE, ne'e tanba mudansa ne'e hotu, ne'ebé MAE agora halo nusa…” Xefe Governu esplika.

Tan ne’e, PM Xanana afirma, bainhira governu dasa moos ona foer no hahú ona kaer ema balun mak nia foin bele responde kona-ba avaliasaun ba membru governu sira.

“Bainhira lixu sira ne'e ami lori hotu ona ba Tibar, auditória komesa kaer ida ne'e, kaer ida ne'eba, ne'e ha'u bele responde avaliasaun ba membru governu sira ne'e. Tanba ne'e mak ohin ha'u dehan 2025 governu ne'e bele servisu ona, tanba iha lixu barak, governu agora atu hamoos, rezultadu auditória mak sei haree,” hatete nia.

Khunto-PLP-Fretilin metin nafatin

Konseleiru Maximu Partidu Khunto, José dos Santos Naimori Bukar deklara, partidu Khunto, PLP no Fretilin kontinu metin nafatin hodi hein eleisaun iha 2028.

Naimori hato’o kestaun ne’e iha Kongresu Nasional Partidu Khunto ba dala haat, ne'ebé hetan partisipasaun husi Sekretariu Jeral Partidu Fretilin, Mari Alkatiri, no Prezidente Partidu Libertasaun Popular (PLP), Taur Matan Ruak, ne'ebé realiza iha 20 to’o 21 Abril 2024.

"Partidu PLP, Fretilin no partidu Khunto sira na'in tolu metin nafatin, partidu tolu ne'e sei harii unidade ida ne'ebé forte iha futuru oin mai, iha eleisaun oin mai (2028)," deklara Naimori liu husi diskursu iha salaun Delta Nova, Domingu (21/04).

Konseleiru ne’e dehan, partidu tolu (3) sai hanesan forsa ida ne'ebé dala-ruma ema haree dook ba malu, maibé loloos ne’e besik liu.

"Unidade ne'ebé mak ita iha durante iha nono Governu lidera husi ita-nia maun Taur Matan Ruak ne'ebé mak fó apoiu tomak husi ita-nia Fretilin hodi asegura Governu ida bele metin. Ida ne'e la fasil, ne'e ema fuan boot no sentidu estadu, hadomi rai ida ne'e no hadomi povu ida ne'e," dehan nia.

Naimori dehan, partidu tolu kontinua respeita votus ne'ebé povu fó fiar ba partidu CNRT no PD iha eleisaun Parlamentar 2023. Maibé partidu tolu ne'e lakon iha eleisaun ho dignidade.

Tanba ne'e, partidu tolu ne'e kontinua akompaña nafatin programa husi Governu dasia ba dezennvolvimentu hodi hadia povu nia moris no hein iha eleisaun 2028 tuir mai.

Rate this item
(0 votes)

Independente Digital TV