Embaixadór Japaun inaugura edifisíu Eskola EBF Cocoa Featured

By Ekipa INDEPENDENTE Abril 22, 2024 962
Foto:Media Gabinete Embaixador Japaun. Foto:Media Gabinete Embaixador Japaun.

ERMERA: Iha 19 Abril 2024, Embaixadór Japaun, Tetsuya Kimura, partisipa serimónia inaugurasaun ba edifísiu eskola foun EBF Cocoa, iha Suku Railaku Kraik, Munisípiu Ermera.

Serimónia inaugurasaun ne’e organiza husi AFDR no ONG lokál ne’ebé implementa projetu refere.

Serimonia ne’e hetan partisipasaun husi Prezidente Autoridade Munisípiu Ermera, Jose Martino dos Santos; Diretór Jerál Ministériu Edukasaun, Apolinario Serpa; ofisiáis governu lokál husi autoridade relevantes; professores; família; no estudante sira.

Embaixadór Kimura hato’o mensájen ba estudante sira kona-bá manutensaun eskola nian no sentidu loloos husi edukasaun.

“Ha’u hakarak husu ba imi atu mantein edifísiu eskola foun ne’e moos no la estraga. Bainhira halo ida ne’e, sei ajuda mós imi-nia alin sira iha futuru. Estuda no aprende sei hariku imi-nia moris no habelar oportunidade ba imi-nia futuru.”

“Japaun mós oferese programa oioin no bolsa-estudu ba Timor-oan atu ba no estuda iha Japaun. Há’u fiar katak imi sira ne’e balun bele hola parte iha programa hirak ne’e, hodi hatene barak liu tan kona-ba Japaun, no kontribui ba dezenvolvimentu ekonómiku no sosiál Timor-Leste nian iha futuru,” dehan Kimura.

Ba projetu ne’e, Governu Japaun fornese asistensia finanseira ho montante $92,403 liu husi eskema programa Fundu Asistensia ba Projetu Komunitáriu no Seguransa Umana (GGP).

Liuhosi projetu ida ne’e, edifisíu eskola foun ne’e konstrui ho sala aula tolu (3) no sala ba mestre sira ida (1), ne’ebé benefísia estudante na’in 146 no mestre na’in 7 iha eskola EBF Cocoa.

Dezde lansamentu projetu dahuluk iha tinan 2000, implementa ona projetu 141 liu husi eskema Projetu Fundu Asistensia ba GGP iha munisípiu 13 iha Timor-Leste.

Maiorparte projetu sira ne’e fornese asistensia infra-estrutura ba komunidade sira, inklui konstrusaun no reabilitasaun ba fasilidade eskola, postu saúde, no sistema abastesimentu bee-moos, no mós rezolve nesesidades bázika balun umana nian iha área rurál.

Rate this item
(0 votes)

Independente Digital TV