Prezidente KSTL, Almerio Vila Nova hateten, KSTL hamutuk  ho membru traballador Timor oan sira hodi kontra desizaun konsellu Ministru ne'ebé rekuza proposta dekretu lei saláriu mínimu Nasionál ne’ebé Sekretáriu Estadu Formasaun Profisionál no Empregu (SEFOPE) aprezenta iha reuniaun Konsellu Ministru iha loron  09 fulan Abril tinan 2024.

KSTL ho membru sira halo asaun ida ne’e tanba sira la konkorda ho desizaun Konsellu ministru nian, ne’ebé rekuza ka rejeita proposta dekretu lei saláriu mínimu ba traballadór sira.

Tanba  ne'e, ohin KSTL halibur traballadór sira mai hamutuk iha sede KASTL Bemori ne’e hodi hala’o asaun protesta ne’e atu hateten ba governu katak desizaun KM nian ne’e la loos.

“ Ho asaun ida ne’e ami KSTL hamutuk ho traballadór sira atu bolu atensaun ba governu no ba Primeiru Ministru hodi tau fali ajendamentu ida hodi lori fali proposta dekretu lei ne’e ba deskute fali iha KM,” Dehan Nia ba Jornalista sira iha sede KSTL, sesta (19/04)

Kona-ba  proposta dekretu lei ne’e prodús bazeia ba desizaun konsellu nasionál Traballu nian ne’ebé kompostu tripartida husi parte governu reprezenta husi Sekretáriu Estadu Formasaun Profisionál Empregu (SEFOPE) husi parte emregadór nian reprezenta husi Kamara Komérsiu no Indústria Timor-Leste (CCI-TL) no husi traballadór reprezenta husi KSTL rasik.

Ho desizaun sira ne’e hotu parte tolu aseita ona liu husi negosiasaun ho konsensu ida ne’ebé akontese iha 2019 konkorda katak saláriu mínimu ba traballador sira ne’e deside ba $164.

Maibé, bazeia fali ba rezultadu peskiza ne’e parte tolu konkorda no hatún fali ba $150, husi desizaun sira ne’e hotu maka parte tolu halo ona esforsu ida hodi aprezenta proposta dekretu lei kona ba saláriu mínimu ba governu ne’e atu halo diskusaun.

Tuir loloos parte governu rona de’it no tetu desizaun no halo mós konsultasaun ba konsellu nasionál do trabalu ne’ebé marka prezensa iha enkontru konsellu ministru ne’e kona-ba saláriu menimu ne'e ho peskiza $164 ne’e ho sala  iha ona konsensu salariu mínimu ida agora $150.

 Ho nune’e bele foti desizaun ruma husi parte ida ne’ebé, Maibé, sira la halo diskusaun ida ho parte Konsellu Nasionál Traballadór nian, maibé sira foti kedan desizaun katak saláriu mimu ne’e sei implika ba investimentu no implika ba kapasidade setór privadu nian no implika ba veteranu sira,” tenik nia

Dezisaun husi  KM nian ne’e la relevante no la fundamentu tebes, tanba traballadór sira ninia servisu ne’e laloos governu mak atu selu,  maibé, empregadór sira mak selu, tanba ne’e nia husi ba governu liu husi KM ninia desizaun ne’e la bele sai fali hanesan rai henek hodi kari fali ba povu no traballadór sira ninia matan.

Entretantu ho asaun ida agora KASTL ho traballadór sira halo ne’e konsidera asaun ne'e ba da-uluk no KASTL sei organiza asaun ida boot liu tan sei tuir mai to’o bainhira hetan ona desizaun ruma kona ba rezultadu saláriu mínimu Timor-Leste nian.

Ne’e duni desizaun ne’ebé KM foti hodi rejeita proposta dekretu lei saláriu Mínimu ne’e hanesan desizaun ignoránsia ida ba povu traballadór sira ne’ebé maka vulneravel tebes.

KSTL husu ba governu atu iha tempu badak nia laran tenke halo revizaun ba saláriu mínimu $115 ne’e ba $150, depois maka halo peskiza foun.

 Ne’ebé Laos ho saláriu mínimu $150 nee maka atu halo fali peskiza ne’e atu hala’o dala hira tan,pilomenus governu aprova tiha proposta dekretu lei saláriu mínimu $150 ne’e maka depois halo fali peskiza foun.

Nune’e mós traballadór loza Jinjang Kulu-hun, Marito da Cruz hateten nia servisu iha loza refere tinan tolu ona maibé kontinua ho saláriu mínimu $115. Tanba ne’e ninia prezensa iha asaun ne’e atu apoiu esforsu Konselllu Nasional nian hadi’a sira nia vida.

“Ami traballadór ki’ik ami nia esperansa maka oinsá ami bele hetan netik saláriu ida sufisiente hodi sustenta nesesidade família nian. Tanba ne’e ami iha nafatin esperansa katak ho saláriu mínimu $150 ne’ebé governu rekuza ne’e hamate ona ami nia vontade," Nia esplika