“Profesór Sira ne'e ema di'ak teb-tebes, tanba transforma ema sai matenek no kualidade loos. Primeiru Governu tenke garante kualidade formasaun ba sira, segundu fó insentivu oioin, labele moris servisu ho konfortu, terseiru infrastrutura, infrastrutura ne'ebé di’ak, eskola tenke di'ak, la'ós luxu, lalika halo uma bot-boot, maibé bele halo matérial lokal ou modernu atual ke di'ak ba klima Timor, importante mak tenke iha bee-moos, saneamentu, haris fatin ba feto sira, mane sira no professor sira, tenke iha sala reuniaun ba profesór sira, buat sira ne'e,” Dehan Prezidente Repúblika, Ramos Horta, hafoin halo abertura ba sosializasaun programa EMuLi, iha salaun INFORDEPE, Balide, Kinta (18/ 04).
Prezidente Ramos Horta dehan, programa sira-ne’e mak prioridade absoluta ba nasaun ida no buat sira ne'e la'o parelelu mós ho nutrisaun.
“Nutrisaun di'ak hahú kedas ho kosok oan sira, iha inan nia kabun, bainhira inan isin-rua tau matan ba inan, tau matan ba kosok oan, depois hahú kedas, ba tinan ida, rua ka tolu. Para evita bolu stunting stigh malnutrition. Buat ne'e la'o hamutuk ho edukasaun, saúde, seguransa alimentár, buat sira-ne'e la'o hamutuk, atu labele fallansu iha ne'e,” Prezidente Horta informa.
Nia informa, iha nasaun Finlandia, ema kuandu halo peskiza ba opiniaun públiku, Finlandia uluk kiak teb-tebes. Agora mak ema temi Finlandia númeru um iha mundu, tanba postituisaun ne'ebé sira respeitu liu mak profesór sira, nune'e husu ba ME haree mós ba ida-ne'e.
“Iha área edukasaun sira halo Survey iha públiku postituisaun ne'ebé povu Finlandia ne'e respeita liu ne'e sira dehan profesor no Profesora sira-ne'e mak númeru um. Purtantu timor tenke haree, nune'e profesór sira, husi pre-eskolár to’o universidade profisaun númeru um. Mais ita iha rai ne'e uluk ha'u Primeiru Ministru, ha'u tuku meza para eleva estatutu Reitór Universidade ni’an, entaun UNTL ne'e universidade nasionál, ne'e ofisial i mais to’o agora Reitór UNTL nia estatutu protokulár, ha'u ko'alia no ejize tau nia estatutu ba Ministru. Tanba Edukasaun ne'e tenke sai prioridade númeru um,” Nia relata.
Hatan ba kestaun ne'e, Ministra Edukasaun, Dulce de Jesus hatete, formasaun ba profesór sira-ne'e kontinua la'o hela, no kontinua tau mós importansia ba infrastrutura sira iha Eskola.
“Ita nian formasaun la'o nafatin liu husi INFORDEPE, tanba INFORDEPE, institutu ida-ne'ebé responsabilidade ba formasaun professores, infraesturtura mos hanesan, hau deklara ona bebeik katak, governu liu husi ME kontinua tau importánsia ba problema infraesturtura eskolár, mezmu seidauk hotu,” Nia relata.
Nia dehan, sala-de-aula balun ne'ebé mak di'ak hela, maibé dala-ruma ho dezastra naturais ne’ebé akontese, bele estraga, entaun númeru ne'e kada vez aumenta, maibe governu kontinua nafatin haree asuntu hirak ne'e iha tinan ida ne'e.
