PR Horta husu Portugal Duni no Balcklist Timor-oan komete Krime iha Fátima Featured

By Cristina Ximenes Juñu 05, 2024 1602
Prezidente Repúblika, José Ramos Horta. Foto:Dok. Prezidente Repúblika, José Ramos Horta. Foto:Dok.

OEKUSSE: Prezidente Repúblika, José Ramos Horta, lamenta tebes ho aktu Timor-oan sira iha Portugal ne’ebé asalta-malu iha sidade sagrada Fátima, iha 2 Juñu ne’e.

Tuir Horta, aktu ne’ebé Timor-oan sira halo iha sidade Fátima ne’e aktu kriminozu tan ne’e di’ak liu duni no blacklist sira.

"Sira-nia aktu ne'e kriminozu, ha'u haruka ona mensajen ba Portugál, primeiro tuir Lei Portugeza. Depois sira ne'ebé envolve iha aktu ne'e, ha'u nia akonselamentu, di'ak liu Governu Portuges expulsa (duni) husi teritóriu Portugés nian," dehan PR Horta ba jornalista sira hafoin seremónia asinatura nota entendimentu entre Autoridade RAEOA ho Timor Aid ba estabelesimentu Muzeu Tais Timor-Leste iha Oekusse, iha otel Oe-Upu, Tersa (04/06).

Tuir Horta, Timor-oan sira, liu-liu elementu grupu artemarsial no ritual, iha rai li’ur, hanesan iha Inglatera no Irlandia Norte, dala-barak ona halo problema no agora halo fali iha Portugál.

“Nune'e, see mak halo (krime), duni sai sira, tau sira blacklist, sira labele tama tan Portugál de'it, labele tama, sira seluk iha mundu ne'e sira blacklist nia laran.”

Xefe Estadu ne’e mós lakohi atu fó apelu ba Timor-oan sira ne’ebé gosta halo problema iha rai li’ur. Tanba fó bebeik ona apelu maibé sira kontinua halo.

"Portugál fenómena ne'e foun maibé apelu sira ne'e ita halo dala hira loos. Igreja mós halo, sira la rona, mais bainhira la rona saida mak halo? justisa, punisaun, ba kadeia ka expulsa (husi) rai ne'ebé sira halo problema ne'e," katak nia.

Iha fatin ketak, Diretór Jerál Asuntu Bilaterál ba Amerika, Eropa no Africa, Francisco Dionisio Fernandes  ‘Maukura’ hatete, Ministériu Negósiu Estranjeiru no Kooperasaun (MNEK) Timor-Leste fó konfiansa ba autoridade Portugál hodi atua problema ne’ebé Timor-oan sira komete iha ne’ebá.

MNEK iha Timor-Leste, kontinua koordena ho Embaixada Timor-Leste iha Lisboa, no Embaixadór ho ekipa mós kontinua halo koordenasaun ho autoridade Portugés.

"Ita-nia komunidade ne'ebé envolve iha konfrontu ne’e balun autoridade Portugés detein ona, submete ona ba prosesu investigasaun, balun fila ona ba idaidak nia fatin.”

“Dala ida tan, MNEK iha Timor-Leste hakarak hatete, situasaun imigrante iha Portugál, la'ós akontese Timor de'it maibé akontese mós ba rai hirak seluk, ne'e duni ita hakarak hatete katak, ita preokupa maibé ne'e aktu individu ne'ebé la reprezenta ita-nia nasaun Timor," dehan Francisco ba jornalista sira iha nia knar-fatin, MNEK, Pantai Kelapa, Tersa (04/06).

Situasaun ne'ebé envolve Timor-oan iha Portugál halo ema hotu preokupa, maibé MNEK fiar katak relasaun entre Timor-Leste ho Portugál kontinua di’ak.

"Buat hotu ita entrega ba ita-nia país maun-alin mak haree, parte husi ita nian mak oinsá atu ita bele kolabora didi'ak, tanba iha ne'e la'ós asuntu bilaterál maibé asuntu mais konsulariu."

Nia hatutan, prosesu investigasaun la'o hela no MNEK Timor-Leste kontinua halo monitorizasaun.

Alerta mós ba Timor-oan sira iha Lisboa-Portugál atu lalika preokupa tanba situasaun iha sidade Lisboa kalma hela.

Kona-ba motivu no see mak envolve iha asalta-malu iha Fátima, Maukura dehan MNEK seidauk iha informasaun klaru. Sei hein rezultadu investigasaun husi autoridade Portugés.

"Bainhira investigasaun klaru ona despois ita sei haree desizaun saida mak autoridade Portugés sira foti, tanba desizaun seluk tuir mai mak deporta. Se bainhira autoridade deside deporta konserteza sira sei komunika ho ita-nia Embaixada iha Lisboa, depois komunika mai MNEK, Diresaun Konsular, atu bele komunika didi'ak oinsa lori fila alin sira, maibé depende ba autoridade Portugés nian," nia afirma.

Molok ne’e, tuir informasaun ne’ebé INDEPENDENTE asesu husi https://diariodistrito.sapo.pt, kazu konfrontu ne’ebé akontese iha 2 Juñu ne’e envolve husi grupu artemarsiais PSHT no grupu arte-ritual 77.

“Polísia Judisiária Portugal identifika kona-ba kazu asaltu-malu entre Timor-oan iha Fatima, Portugal, rezulta Timor-oan ida ho naran DR mate no daudaun ne’e prosesa ba autópsia,” sita INDEPENDENTE husi Sapo, Segunda (03/06).

Sapo relata katak, Inspetór Xefe Polísia Judisiária Prortugal dehan, akontesimentu ne’e envolve Timor-oan na’in 30 resin ne’ebé mai husi Setubal, Evora no Lisboa.

Husi konfrontu ne’e rezulta na’in ida mate no na’in lima kanek todan.

Rate this item
(0 votes)

Independente Digital TV