Problema ne’ebé ekipa PDHJ identifika mak stock out ba aimoruk ne’ebé kontinua akontese no problema espasu iha ospital ne’ebé obriga pasiente balun tenke toba de’it iha areador ospital.
Provedór Direitus Humanus no Justisa, Virgilio Guterres hatete, PDHJ iha ninia kompetensia atu halo supervizaun ba entidade públiku sira, liu-liu ba preokupasaun kona-ba problema ne’ebé mosu.
Ho nune’e, iha semana tolu liu ba, ekipa husi PDHJ halo averiguasaun ba HNGV no identifika problema balun iha ospital nasionál ne’e.
“Bazeia ba iha prosesu averiguasaun ne’ebé ekipa PDHJ halo iha semana tolu liu ba, ne’ebé sira hakerek iha relatoriu preleminariu ne’ebé ha’u simu, katak ospitál nasionál iha duni stock out ba aimoruk,” informa Provedor Virgilio ba jornalista sira hafoin hasoru-malu ho dirijeten iha HNGV, Kuarta (05/06).
Ekipa, nia dehan, identifika aimoruk 13% no konsumavel 11% mak stock out.
“Ospital hanesan HNGV labele falta aimoruk. Aimoruk tenke estavél, se aimoruk menus 5% ka to’o 11%, ne’e situasaun ida ne’ebé ke preukupa. Entaun ida ne’e mak preukupasaun ne’ebé halo ami to’o iha ne’e i sei koalia ho pesoál sira ne’ebé ke responsavél, liu-liu iha parte polítika ninian atu halo intervensaun imediata oinsá atu estabiliza situasaun ne’e,” dehan Virgilio.
Tuir nia, maske situasaun ida ne’e seidauk konsidera grave, maibé tenke buka solusaun.
“Tanba por ezemplu hanesan saida mak Diretora (HNGV) ohin esplika mai, dala-ruma aimoruk laiha pasiente sira tenke ba sosa iha li’ur,” dehan nia.
Virgilio informa, nia parte sei vizita INFPM hodi husu kona-ba stock out iha HNGV no prosesu aprovizionamentu ba aimoruk.
“Ami mós sei ba hasoru-malu ho Ministra no Vise Ministru atu kolia iha nivél politika hodi sira bele fó solusaun liga ho stock out iha ospitál nasionál,” dehan nia.
Aleinde problema stock out, nia dehan, ekipa PDHJ identifika mós problema iha tratamentu ba pasiente sira.
“Tanba iha HNGV totál kama ba pasiente nian iha 340 resin no dala-ruma pasiente balun toba iha li’ur, entaun HNGV tenke iha kama estra,” dehan nia.
Iha fatin hanesan, Diretora Administrasaun, Finansas no Lojistiku, Sara Maria Filomena Xavier rekoñese dadus ne’ebé PDHJ identifika.
Maibé, nia dehan, HNGV iha jestaun rasik oinsa atu buka meius atu atedimentu ba pasiente kontinua lao.
Sara hatete, HNGV iha orsamentu emerjensia $100.000 ne’ebé sufisiente atu sosa aimoruk no konsumavel.
“Orsamentu ne’ebé mak preve ba kompra emerjensia ba aimoruk ne’e ita iha $100 mill, ne’e sufisente,” dehan nia.
Bainhira mosu stock out iha HNGV, nia dehan, sira hato’o karta justifikasaun ba INFPM atu uza orsamentu emerjensia hodi sosa direita.
Kona-ba pasa reseita ba pasiente sira atu sosa aimoruk iha farmasia privadu, Diretora ne’e rekoñese no dehan katak ida ne’e provozoriu de’it.
“Iha duni pasiente ne’ebé mak lori reseita ba iha apotik hodi sosa aimoruk ne’e durante loro tolu kuandu aimoruk iha bele bolu mai foti fila fali (iha HNGV),” dehan nia.
Aimoruk 17% stock out iha Kovalima
Diretór Servisu Saúde Munisipiu Kovalima, Domingos Sequeira informa, total item aimoruk iha Servisu Saude Munisipiu Kovalima hamutuk item 262, husi númeru ne’e item 46 mak stock out.
"Aimoruk husi munisipiu Kovalima agora daudaun ita iha 46 item mak stock out, ne'e kompostu husi esensial, vital no nessesariu,” dehan Domingos iha salaun Komisaun Nasionál Eleisaun, Kuarta (05/06).
Maske stock out, maibé nia dehan, ida ne’e la signifika katak aimoruk laiha loos, maibé iha alternativu seluk ne’ebé bele uza hodi kontinua fó tratamentu saude ba komunidade sira.
Kada fulan, Domingos dehan, nia parte sempre halo pedidu ba Institutu Nasionál Farmasia no Produtu Mediku (INFPM), bainhira aimoruk iha, sira responde kedas.
“Maske INFPM responde kedas maibé ohin item ida tama aban ida bele stock out, tanba ne'e sempre mosu stock out hela de’it tanba aimoruk sira ne'ebé distribui ba ne'e laos rai de’it maibé responde hotu ba iha komunidade sira,” katak nia.
