Ekipa avaliasaun husi Vatikanu hato’o sira-nia apresiasaun ne’e bainhira hasoru-malu ho Primeiru Ministru, Kay Rala Xanana Gusmão.
Arsebispu Arkidioseze Metropolitana Dili, Dom Virgilio Kardeal do Carmo da Silva, ne’ebé akompaña ekipa husi Vatikanu informa, hafoin halo avaliasaun durante loron rua, ekipa halo enkontru ikus ho PM Xanana.
Iha enkontru ikus ne’e, Dom Virgilio Kardeal dehan, ekipa fó informasaun ba Xefe Governu kona-ba buat ruma ne'ebé presiza hadia di'ak liu tan iha fulan tolu ninia laran molok Amu Papa vizita no fó mós sira-nia apresiasaun.
"Ha'u hanoin einjeral sira fó sira-nia apresiasaun di'ak katak sira haree preparasaun lojistiku, intermus seguransa no parte Igreja ninian haree katak ekipa hotu-hotu halo ona ninia parte," dehan Amu Bispu iha palasiu governu, Kuarta (05/06).
Dom Virgilio hatutan, ekipa ne’e haree katak kompara ho sira-nia vizita anterior iha Janeiru liu ba, preparasaun daudauk ne’e di’ak liu, tanba hotu-hotu haka'as aan no hatudu responsabilidade masimu.
"Ita laiha ona buat sira ne'ebé einjeral, buat boot, importante liu-liu sira fó hanoin mai ita mak dehan oinsá mak garantia katak Amu Papa nia vizita ne'e katak ema hotu-hotu sente duni Papa nia vizita ne'e sai fatin ida ne'ebé hakmatek."
"Sira dehan ho Amu Papa ita ladun preokupa, maibé oinsá mak sarani hotu-hotu bele sente fatin ne'ebé di'ak, hakmatek ho kuantidade ne'ebé sarani mai partisipa ne'e labele mosu kauza buat ruma ne'ebé ita la hein. Ida ne'e mak sira fó hanoin ba ita atu oinsá kria kondisaun hotu-hotu atu ema hotu hakmatek hodi simu ida ne'e," Amu Bispu ne’e afirma.
Iha fatin hanesan, Ministru Administraun Estatal, Tomas do Rossario Cabral informa, ekipa husi Vatikanu mai iha Timor-Leste iha 24 Janeiru no pronunsia kalendariu iha 12 Abril 2024.
Tan ne’e, ba preparasaun hotu ne’ebé hala’o daudauk ne’e lao tuir kalendariu ne’ebé aprova ona.
“Hanesan Amu Bispu dehan, sira mai aprova tanba ita la'o tuir kalendariu, ate Agostu ne'e buat hotu tenke hotu ona, ne'ebé ita lao ne'e tuir kalendariu," dehan Ministru Tomas.
Nia espera katak ho servisu ne’ebé lao daudauk ona bele finaliza molok loron 15 Amu Papa vizita TL.
Altar iha Tasi Tolu atinze 70%
Konstrusaun ba altar ba misa espesial Amu Papa Francisco, ne’ebé halo husi PT Bina Karya Timor-Leste atinze ona porsentu 70.
Kontrusaun ne’e hahú implementa iha 18 Marsu no tuir planu sei finaliza iha 31 Jullu 2024.
“Ami nu’udar parte implementador projetu, ha’u rasik nu’udar Jerente Kampu de Projetu, Supervisor no Enjeneiru na’in haat, serbisu maka’as, ho efikas no efisiente oinsa bele atinze rezultadu projetu 100% iha 31 Jullu, hodi hetan aprovasaun husi Obras Publiku, nu’udar parte ne’ebé responsavel maximu ba projetu konstrusaun,” dehan Jerente Kampu Projetu, Agus Hartati ba jornalista INDEPEDENTE, iha Tasi Tolu, Aldeia 12 de Outubro, Suku Komoro, Tersa (04/06).
Agus dehan, nia parte responsavel atu halo konstrusaun ba altar ho naruk metro 53 no luan metro 42, konstrui mós dalan no sintina jeral 3.
Durante implementasaun projetu ne’e, nia dehan, husi Obras Publiku no ADN nafatin halo monitorizasaun hodi garante ninia kualidade tuir akordu ne’ebé iha.
