Xefe Estadu ne’e dehan, koalia kona ba agrikultura, sistema irigasaun sira mós tenke hadia, tanba ne’e prioridade tenki tau duni orsamentu ba setór agrikultura no seguransa alimentar atu nune’e bele hetan fini ne’ebé kualidade.

“Prioridade ita tenki tau duni orsamentu no buat hotu-hotu foku ba ida ne’e maka agrikultura no seguransa alimentar  no ida ne’e ligadu ho sistema ingasaun, sé ko’alia kona ba agrikultura, seguransa alimentar tenki koalia mós ba parte siensia, signifika oinsa ita bele hetan fini musan ne’ebe kualidade no diak liu, ba agrikultura atu ita nia batar sira ne’e ho produsaun kualidade, tanba nee batar sira ne’ebé kuda ne’e tenki ho kualidade diak, modo aifuan no buat sira ne’e hotu tenki tau matan,”dehan nia liu husi Konferensia Imprensa ne’ebé hala’o iha Hotel W, Kuala Lumpur, Malázia, Tersa ne’e (28/10/25).

Iha Timor-Leste, Prezidente Repúblika José Ramos Horta rekoñese, Governu seidauk tau matan ba produsaun aifuan.

“Iha rai ita nian ne’e, ha’u nunka haree governu tau matan ruma ba produsaun aifuan kuaze ida-idak halo iha nia uma, iha nia kintal, ita hakarak ekonomia la’o, tau matan tuir estratejia ita nian ba área sira ne’e,” tenik Horta.

Horta afirma, durante tinan ida nia laran, Governu ko’alia bebeik, maibé laiha iha ró ahi ida ne’ebe Governu apoiu ba peskas nian, maibé tau deit osan boot ba ró haksolok, no ema barak hakarak investe maibe problema iha setór ekonomia, finansas, komersiu.

“Peskas tinan ida nia laran koalia-koalia, mas ita nem iha ró ahi oan ida ne’ebe governu apoiu ba peskas nian ne’e, ita só tau osan boot ba haksolok iha Portugal ne’ebá, parte seluk tan mak problema boot iha setór ekonomia, finansas, komersiu, ema hakarak halo investimentu ruma tenki demora atu resolve, halo kontaktu ba rai difisil loos no rejistu empreja difisil los”.