Ezemplu simples ida mak folin deterjente ba Projetu iha Dili ho Baukau ne’ebé dook tebes. Ba edifisiu Sentral Ministériu Saude (MS) iha Dili, kompaña Evip Marel II fornese deterjente Rinso/Daya ho kuantidade 40 pcs, ho folin kada pcs $20, nune’e ba 40 pcs ne’e gasta $800. Ba tinan ida, deterjente 40 pcs ne’e gasta total $9,600.
Ba Hospital Referal Eduardo Ximenes (HoREX) Baukau, kompaña fornese rinso kaixa 50, ho folin kada kaixa $5, nune’e ba kaixa 50 gasta $250. Ba tinan ida nian gasta $3,000.
Bainhira kompara kontratu ho númeru RDTL-MS-UAC-KP-25-030A ba Projeru Limpeza edifisiu sentral MS ba tinan 2025, ho kontratu númeru RDTL-MS-UAC-KP-25-029A ba Projetu Limpeza HoREX Baukau ba tinan 2025, folin husi sasan no material barak mak diferente.
Ezemplu seluk mak gayung kuru bee. Iha Dili, kompaña fornese 25 pcs, kada pcs ho folin $12, nune’e ba 24 pcs ho folin $300.
Enkuantu, iha HoREX Baukau, kompaña oferese 34 pcs, kada pcs ho folin $3, nune’e ba 34 pcs ho folin $102.
Tuir mai deskrisaun komparasaun folin ba projetu iha Dili no Baukau bazeia ba kontratu ne’ebé Ministra Elia asina ho kompaña Evip Marel II.
- Carpet boracha 50x80cm, iha Dili, ida ho folin $20, enkuantu iha Baukau, ida ho folin $10.
- Carpet boracha 60x120cm, iha Dili $12, iha Baukau $5
- Rinso/Daya, iha Dili $20, iha Baukau $5
- Hand soap lifebuoy, iha Dili $20, iha Baukau $5
- Vistec, iha Dili $20, iha Baukau $5
- Baygon, iha Dili $45, iha Baukau $5
- Safety boots, iha Dili $15, iha Baukau $4
- Glasses, iha Dili $15, iha Baukau $8
- Pruning shears, iha Dili $15, iha Baukau $10
- Machete/Cutlass (katana) 60cm, iha Dili $15, iha Baukau $10
- Hand lever (alavanca) 60cm, iha Dili $15, iha Baukau $10
- Fork of garbase (garfo de lixo) besi, iha Dili $15, iha Baukau $10
- Gayung kuru bee, iha Dili $12, iha Baukau $3
- Makina tesi duut, iha Dili $60, iha Baukau $45
- Escova para casa de banho, iha Dili $20, iha Baukau $5
- Escovas para pias e lavatories, iha Dili $20, iha Baukau $5
- Mop lovi Daster, iha Dili $10, iha Baukau $5
- Espandor (manu fulun) hamoos foer, iha Dili $10, iha Baukau $5
Ministra Elia hatan
Ba kestaun ne’e, Ministra Saude, Elia dos Reis Amaral hatete, governu Konstitusional dasia hakarak katak servisu hotu-hotu ne’ebé hala’o tenke transparansia no tuir dalan legal ne’ebé iha.
Tan ne’e, Ministra Elia fiar katak, prosesu ne’ebé ninia Ministériu hala’o lao tuir ona dalan aprovizionamentu nian.
“Se ita-boot sira haree komparasaun ka ha’u fó ezemplu de’it eeh.. ne’e ezemplu, hanesan pur ezemplu, karik iha neseidade balun ita husu barak liu, automatikamente orsamentu mós sei aumenta, se ita husu menus orsamentu mós sei menus, ida ne’e hanesan fó ezemplu de’it,” dehan Ministra ne’e ba Jornalista sira hafoin reuniaun Konsellu Ministru, iha Palasiu Governu, Kuarta (08/10).
Ministra ne’e afirma, prosesu hotu-hotu ne’ebé la’o tuir ona dalan aprovizionementu ne’ebé iha.
Kona-ba deskonfiansa katak kompaña ne’e iha relasaun ho nia, Ministra Elia hatan: “Ita-boot bele responsabilidade? Ne’e ita-boot koalia hanesan difama ha’u.”
Bainhira Jornalista koko husu tan pergunta seluk, Ministra Elia lakohi ona fó komentariu.
Entretantu, parte kompaña Evip Marel II to’o notisia ne’e públika la disponivel atu fó sira-nia komentariu.
