Deputadu Bankada FRETILIN, Antóninho Bianco hateten, governu tenke orienta mós ba ministériu ida-idak para bele prepara aan didi'ak ho pesoa sira ne'ebé la'os nomeasaun polítika para tama iha parte ne'e ho dignu.
“Tenke prepara rekursus umanu para reforsa faze andamentu iha prosesu ema dehan integrasaun plena iha ASEAN nian," dehan nia, iha plenaria PN, horisehik.
Nia dehan, la'os ASEAN de'it, depois de sai membru ASEAN hotu Timor mós tenke kumpre regra sira ne'ebé liga ba la'os ASEAN, nia regras mós tenke engloba mós iha pais hirak ne'ebé Timor atu tama ne'e, ne'ebé regra barak ne'ebé tenke halo.
Adezaun ba ASEAN ne'e agora atu tama mas ne'e la'os integrasaun, tanba faze ASEAN ne'e komponente tolu importante tenke serbisu depois de adezaun ASEAN. Maibé faze integrasaun ASEAN iha aspetu polítiku, ekonómiku, sosiu kulturál maka Timor-Leste tenke prepara di'ak.
"Ema dehan reforma polítika karik iha polítika hanesan ne'ebé ke tenke halo para ke ita labele dook husi ASEAN, reforma polítika institusional ne'e tenke profisional halo adaptasaun ho regra," dehan nia.
Adaptasaun ASEAN ne'e, sosiu kulturál, ne'e area sira ne'ebé edukasaun, saúde, ho instituisaun sira ne'ebé ke tenke ne'ebé ne'e la'os kestaun polítika, maibé kestaun de adezaun desizaun para formalmente atu tama, maibé depois de adezaun ne'e integrasaun plena iha ASEAN ne'e kestaun importante tenke.
Iha fatin hanesan, Vise Ministra Asuntu ASEAN, Milena Rangel hateten, dadaun ne'e prepara hela ba adezaun maibé integrasaun rejionál ne'e sei han tempu, maibé rekomendasaun sira toma nota.
"Ita asegura uluk adezaun, integrasaun sei han tempu uitoan fazeadamente para depois ita bele integra," tenik nia.
Tuir Milena, integra polítika seguransa, sosiu kulturál no mós ekonómiku, integrasaun rejionál leva tempu, maibé hakarak maka integrasaun rejionál ne'e para bele goza merkadu ida vibrante dinamiku hola parte ona ba jeografikamente.
Nia fundamenta, MNEK hanesan asegura serbisu hamutuk ho liña ministérial sira hotu asegura adezaun bele akontese ne'e esforsu koletivu hotu-hotu kontribui.
