PR Horta dehan, orsamentu atu hadi’a eskola sira iha Timor tomak, lalika luxu, halo kualidade iha sintina, hariis fatin, uma kakuluk labele kuak.

"Governu liu husi Ministériu Edukasaun sektorál tenke haree didi'ak tau orsamentu bo'ot liu ba edukasaun, tenke prióridade ida númeru ida, orsamentu atu halo saida, hadia eskola sira iha Timor tomak, lalika luxu, halo kualidade iha sintina, hariis fatin, uma kakuluk labele kuak, haree tau internet iha ne'eba, tenke haree enfermeiru ida ka rua iha grupu eskola," dehan nia, iha Salaun STM Bekora, horisehik.

PR Horta hatete, haree nutrisaun di'ak liu, mobiliza estudante sira hamutuk ho Direitór eskola atu kuda modo, kuda aifuan iha eskola fatin, buat sira ne'e tenke organiza didi'ak tau orsamentu.Tenke tau vensimentu di'ak ba professor sira, mas professor sira mós tenke hatene simu sira nia responsabilidade.

"Ha'u haree vensimentu professor sira nian ladun hanesan uluk $300-$400 ne'e di'ak ona uitoan, maibé se ita selu osan bo'ot ba deputadu sira, ba asesór sira, ba adidu ne'ebé ba Embaixada sira, entaun favór tau osan di'ak liu ba professor sira, liu-liu sira iha foho ne'e," hatete PR Horta.

Entretantu Prezidente Repúblika José Ramos Horta hatete, ho orsamentu ne'ebé kada tinan 1.8 de'it la sufisiente presiza eskola rihun rua to'o rihun tolu.

Alende ne'e PR haktuir, agora ho kambu sumbriñu atu mai tenke lori dijtalizasaun ba eskola sira.