Tuir komunikadu imprensa ne’ebé INDEPENDENTE asesu,  ahi haan ona ai-laran liu ektare 62 no hamate ona ema na’in hitu.

Governu Portugal deklara situasaun kalamidade iha fatin ne’ebé afeitadu no operador rihun resin kontinua esforsu hodi kontrola ahi ne’ebé lakan.

"Governu Timor-Leste manifesta ninia profunda solidariedade ba povu no Governu Portugál, hafoin inséndiu florestál boot ne’ebé afeta zona balu iha rejiaun norte no sentru nasaun nian iha loron hirak ikus ne’e," deklara Ministru Prezidénsia Konsellu Ministru no Portavós Governu, Agio Pereira, liu husi komunikadu ne'ebé asesu husi Media Gabinete Prezidensiá Konsellu Ministru, Kinta (19/09).

Governu Timor-Leste hato’o ninia sentidu kondolénsia sinseru ba família vítima sira no louva korajen husi bombeiru sira no autoridade hotu-hotu ne’ebé envolve hodi nafatin firme kombate ahi no fó apoiu ba komunidade sira ne’ebé afetadu.

“Iha tempu krize ida ne’e, ami reafirma ami-nia kompromisu ba amizade no kooperasaun ho Portugál. Ami-nia hanoin hamutuk ho ema hotu ne'ebé afetadu husi trajédia ida ne'e, liuliu família vítima sira no operadór brani sira ne'ebé dedikadu atu proteje vida no propriedade sira. Ami iha konfiansa katak Portugál sei rezolve situasaun ne’e ho reziliénsia no unidade, hodi ultrapasa dezafiu ida-ne’e," dehan Agio.