Prezidente Konsellu Administrasaun BNCTL, Lucia Flor hatete, eventu lansamentu ba kartaun Union Pay Internasionál hatudu katak BNCTL hakat pasu importante ida iha prosesu meilora atendimentu ba kliente sira.
"Kartaun Union Pay Internasionál sei fasilita kliente sira hotu hodi asesu ba sira-nia konta iha rai laran no mós bele asesu liu husi ita-nia sistema pagamentu P24 no mós importante liu iha rai li'ur.”
“Projesaun levantamentu ka pagamentu ne'ebé mak ita-boot sira presiza halo rai li'ur, la presiza lori tan osan chas mais ho de'it ita-nia kartaun Union Pay Internasionál BNCTL, osan iha ita-boot nia liman laran no banku ho ita-boot," dehan Lucia iha serimonia lansamentu kartaun UnionPay iha salaun El-Legendario, Bidau Lecidere, Sesta (20/09).
Ho utilizasaun kartaun UnionPay, nia dehan, BNCTL sai ona hanesan banku prinsipál ne’ebé domina iha merkadu finanseiru iha Timor-Leste.
Iha fatin hanesan, Vise Primeiru Ministru no Ministru Koordenadór Assuntu Ekonómiku no Ministru Turizmu Ambiente, Francisco Kalbuady Lay, lori governu nia naran parabeniza BNCTL.
Tuir nia, eventu lansamentu ida ne’e marka pasu importante iha viajen Timor-Leste nian ba dezenvolvimentu ekononomia.
"Ba oin kartaun UnionPay internasionál la'os de'it produtu foun ida maibé hanesan mós portaun ba oportunidade foun sira no hatudu katak ita-nia komprimisiu atu integra Timor-Leste iha ekonomia global," nia dehan.
Tuir Kalbuadi, kartaun Union Pay Internasionál mak kartaun pagamentu global ne’ebé permite individual sira hala'o transaksaun ho ekipa, aumezmu ho setór privadu sira hotu-hotu ho lalais.
Rede UnionPay sai hanesan rede pagamentu boot liu iha mundu tanba fornese meiu ida ne'ebé fiar aan no seguru hodi jere transaksaun finanseiru sira iha nível lokal no International.
“Kartaun ida ne'e fasilita pagamentu no levantamentu osan iha fatin rihun ba rihun iha mundu tomak, oferese mós konvidar ne'ebé la hanesan ba ita-nia sidadaun no vizitante sira,” dehan nia.
Ministru ne’e hatutan, ho kartaun UnionPay ne’e signifika TL agora iha ligasaun ho rede global ida ne'ebé boot no sai nu’udar integrasaun ida ne'ebé la'os de'it apoia Timor nia emprezariu lokál nia viajen sira, maibé mós hasa’e TL ba ninia vizibilidade iha nível globál.
"Bainhira vizitante international sira mai iha ita-nia rain, tasi ibun sira no restaurante, loja sira, hanesan imi hotu ne'ebé tuur iha ne'e ba bebeik Timor Plaza, ba Bali, no ba iha Singapura, (fatin) oioin de'it, Union Pay internasionál sei fornese metodu ida ne'ebé fasil ho familiar hodi jere sira-nia finansas, hodi promove ambiente ida ne'ebé di'ak liu ba turizmu nune'e mós ba komersiu," nia salienta.
Saida mak UnionPay
Hanesan INDEPENDENTE sita husi www.obcb.id, UnionPay nudar asosian iha industria kartaun bankaria ida iha Xina ne’ebé hala’o operasaun ho konkordansia husi Banku Popular Xina (PBOC).
Aleinde ne’e, UnionPay hanesan industria ne’ebé ho ninia papel nu’udar liña entre banku ne’ebé liga makina ATM husi instituisaun bankaria iha Republika Xina, exeptu Hong Kong no Macau.
Liu husi ninia parseria ho instituisaun bankari liu 2.500, UnionPay International hafasil ema ne’ebé uza ninia kartaun.
Tanba, kartaun husi UnionPay International nu’udar meiu pagamentu ne’ebé bele simu iha nasaun no rejiaun 180.
