Xefe Suku Bahatata, Postu Administrativu Uatukarbau, Munisipiu Vikeke, Patricio Maria Pinto informa, udan boot ne’ebé monu-rai hodi provoka inundasaun rezulta labarik ida lakon vida.
Labarik ne’ebé identifika ho naran Nélia da Cruz ne’e mota lori iha 17 Setembru bainhira nia atu ba natar hodi ajuda nia inan-aman.
Iha tuku 1 loraik, hafoin fila husi ekola, Nelia ho nia bin ho idade tinan 14 no nia maun ho idade tinan 10, lao husi sira-nia hela-fatin iha aldeia Neluwai ba sira-nia natar.
Bainhira to’o iha mota Waiborunaha, maun-alin na’in tolu ne’e hakur mota, maibé teki-teki mota boot tuun. Nelia nia bin ho maun konsege salva an, enkuantu Nelia mout iha mota laran.
Esforsu lubuk halo hodi bele hetan labarik ne’e nia isin, ikus mai, liu loron rua, komunidade balun hetan Nelia nia mate-isin iha mota Irabere.
Aleinde rezulta labarik ida lakon vida, Patricio hatete, inundasaun estraga mós komunidade nia natar kuaze ektares 40 ne’ebé atu koileta ona.
"Ita-nia komunidade atu koileta mak hetan estragus, kuaze ektares 40, iha suku Bahatata, seidauk konta hotu suku seluk mós," informa
Xefe Suku ne’e hato’o ona informasaun ba Administradór Postu Administrativu hodi bele koordena ho parte relevante sira atu halo levantamentu dadus.
Iha fatin ketak, Administradór Postu Administrativu Uatukarbau, Munisipiu Vikeke, Ancleto Doutel informa, inundasaun ne’ebé akontese estraga hotu komunidade nia plantasaun no haré ne'ebé koileta ona.
Nia informa, udan boot ne’ebé provoka inundasaun afeita ba suku neen ne’ebé lokaliza iha Postu Administrativu Uatukarbau.
Agrikultór sira ne’ebé hetan afeita maka’as mak agrikultór sira iha Bahatata, Irabin Kraik, Irabin Leten, Wani Uma no Afaloicai.
"Haré komunidade sira koa hotu ona, balun hada hamutuk, bee-sa'e hoban hotu no ida koa ona sei iha natar laran seidauk hadia hamutuk bee lori hotu ba tasi no tahu taka hotu,” dehan Ancleto ba Jornalista INDEPENDENTE via telefone, Sabadu (21/09).
Daudauk ne’e, nia dehan, udan sei kontinua monu-rai tan ne’e nia parte seidauk halo levantamentu dadus ba agrikultór sira ne’ebé sai vitima.
"Ita seidauk idenfika, rejista loloos natar no haré komunidade sira nian hira mak hetan estragus, maibé situasaun iha ne'e udan boot nafatin,” dehan nia.
Entretantu, Diretor Jerál Ministeriu Agrikultura no Peskas (MAP) Munisipiu Vikeke, Olivio Soares Freitas hatete, mota estraga duni komunidade nia natar no haré, maibé nia parte seidauk iha dadus.
"Dadus ne'e ha'u hein hela ekipamentu pezadu husi nasionál daudaun ne'e ida dalan ona to'o iha ne'e, aban (ohin) ami sei tuun ba haree fatin sira ne'ebé inundasaun estraga komunidade nia haré no natar sira ne'e hafoin halo verifikasaun ba dadus sira loloos," katak nia.
