PR Horta dehan, relasaun entre Timor Leste ho Xina nasaun rua buras bei-beik iha tinan 23 ikus ne'e.
"Adezaun ba ASEAN iha tinan 2025 sei aumenta investimentu xinés sira iha área sira hanesan otél, sentru konvensaun sira, estrada sira, ospitál sira. Relasaun entre ita-nia nasaun rua buras bei-beik iha tinan 23 ikus ne'e," dehan PR Horta liu husi nia diskursu iha okaziaun aniversáriu Fundasaun Repúblika Xina nian ba dala 75 iha Embaixada, Sesta (20/09).
Nune'e, vizita estadu PR Horta ba Xina asina akordu sei lori liutan Timor Leste nia kooperasaun.
"Ha’u-nia vizita estadu no asina akordu no MoU sira sei lori liutan ita-nia kooperasaun no amizade ba nivel ida ne’ebé aas liu," hakotu PR Horta.
Antes ne'e, iha loron 02 fulan Abríl 2024 Vise Primeiru Ministru, Ministru Kordenadór ba Asuntu Ekonómiku, Ministru Turizmu no Ambiente, Francisco Kalbuadi Lay hatete, Estadu Timor-Leste kontinua halo esforsu ida maka'as atu bele adere ba Association of Southeast Asian Nation (ASEAN) iha tinan 2025.
Nia esplika, Timor-Leste nia jornada atu sai membru ASEAN, forma ona dezde tinan 2011, apezar dezafiu sira ne'ebé Timor hasoru, ne'e sai hanesan prosesu ida ba dezenvolvimentu Timor-Leste nia adezaun ba ASEAN.
"Hanesan ita boot sira hatene katak, iha enkontru kortezia ida ne'e ha'u fiar katak, enkontru ida ne'e hatudu ami nia komitmentu planu atu sai membru ASEAN iha 2025," dehan Vise Primeiru Ministru, Ministru Kordenadór ba Asuntu Ekonómiku, Ministru Turizmu no Ambiente, Francisco Kalbuadi Lay hafoin remata sorumutu entre membru sira ho Sekretáriu Jerál ASEAN Kao Kim Hourn iha Salaun enkontru Ministériu Finansas Aiatarak Laran.
