Xefi Aldeia Neluwai Lourenço Guterres hateten, durante loron lima nia laran komunidade, autoridade lokal hamutuk ho Ofisal Polisia Suku (OPS) apoiu husi Protesaun Sivil Munisipiu Vikeke konsege hetan ona estudante Nélia da Cruz ne'ebé mota lori iha loron hirak liu ba.
"Ohin komunidade sira ne'ebé halo natar iha area Nabo ba buka karau mak hetan alin estudante ne’e nia mate isin iha tuku 04:00 loraik, depois komunika ami tun ba hare mais nia isin sorin la kompletu ona tanba asu han tiha la no roupa ne'ebé alin ne'e hatais mós laiha hotu ona," informa Lourenço ba jornál INDEPENDENTE liu via telephone, (21/09).
Nia informa, alin estudante ne'e mota lori iha loron 17 Setembru 2024, bainhira matebian hamutuk ho nia maun ho bin boot sira la'o hamutuk hakat mota derepente mota boot tun lori Matebian Nélia da Kruz to'o lakon, maibé nia bin ho maun konsege salva aan.
Informasaun ne'e matebian nia bin ho maun konta ba ami katak, kazu ne'e akontese, bainhira matebian Nélia da Kruz ne'e ho nia maun no bin sira sai eskola meudia, depois to'o uma troka tiha, depois sira nain tolu bolu malu ba tuir inan-aman, entaun sira hakat mota derepente mota boot tun lori Matebian ne'e no nia bin ho maun konsege salva aan," informa nia.
Nia haktuir, iha akontesimentu ne'e mota lori metebian Nélia da Kruz ho nia maun, maibe nia maun konsege kaer fatuk salva aan no nia bin halai sai ba informa ba inan-aman no komunidade sira mai hasai nia alin mane ne'ebé salva aan tur iha fatuk leten kontinua buka tuir nia alin feto Nélia da Kruz la konsege hetan.
"Bainhira akontese ha'u simu informasaun informa kedas ba ha'u OPS ho Autoridade Protesaun Sivil iha Munisípiu Vikeke sira apoiu ami ho família no komunidade buka tuir loron haat la hetan, depois to'o loron lima mak foin hetan kondisaun mate no isin loron la kompletu ain parte los asu han ona," Subliña nia.
Iha parte seluk Xefi Suku Bahatata Patrisio Maria Pinto hateten Dezastre ne'e akontese, bainhira labarik nain tolu hanesan bin alin sira sai eskola bolu malu ba tuir inan-aman iha naran mak akontese mota lori Nélia da Kruz tinan 7 to'o lakon vida.
"Kronolojia ne'e labarik nain tolu, nu'udar bin no alin sira inan-aman ida de'it, sira sai eskola to'o uma troka tiha sira bolu malu ba tuir inan-aman iha natar, depois hakat mota Waiborunaha derepente mota boot tun lori Nélia da Kruz, hafoin hela fali hodiseik loron 21/09 tuku 04 loraik mota ikun area nabo irabere Larisula nian isin la kompletu ona," informa nia.
Nia dehan udan boot ne'e akontese iha loron 17/09 iha foho matebian, mai to'o Uatocarabau ne'e udan hotu, depois labarik sira ne'e sai eskola atu tuir ba inan-aman iha natar sira liu iha mota Waiborunaha mak deperente mota boot lori sira nain tolu rua konsege salva aan naran Nélia da Kruz tinan 7 ne'e mota lori lakon la konsege salva.
Tanba ne'e familia ho Komunidade buka tuir durante loron lima nia laran la hetan, depois Komunidade balun iha natar ba haree karau mak hetan fali iha Nélia da Kruz kondisaun Mate ona roupa ne'ebé matebian uza laiha ona no ain solin parte los asu han ona.
Agora dadaun hetan apoiu ona kaixaun hudi Diresaun Ministeriu Solidaridade Sosial Inkluzaun iha Munisipiu Vikeke hodi lori ba moris fatin Aldeia Neluwai suku Bahatata, Postu Administrativu Uatulacarabau hodi kontinua halo prosesu funebre.
Iha fatin hanesan, Komandante Operasaun Protesaun Sivil Munisipiu Vikeke, Cerilio Soares Gomes hateten, dezastre mota lori estudante Feto ida naran Nélia da Kruz tinan 7, dadaun ne'e komunidade ho família hamutuk ho Autoridade Protesaun Sivil Munisipiu Vikeke no PNTL buka hetan ona alin ne'e nia isin mate, maibe isin la kompletu ona.
"Agora ita entrega ona ba família atu halo prosesu funebre, depois ha'u fila husi Dili mak organiza ekipa APS Vikeke atu ba apoiu emerjensia kona-ba nesesidade baziku," hakotu nia.
