“Reinu Kambódia nu’udár Reinu antigu tebes, nia istória luta, terus mós hanesan ita, tanba ne’e, sira simpátia maka’as tebes-tebes. Ohin ko’alia ho Liurai nu’udár ema artisita ida. Ohin, hanesan hakat ida husi diplomasia ho Kambódia ba tinan 20 nia laran,” dehan Xefe Estadu, liu husi komunikadu ne’ebé Online INDEPENDENTE, asesu iha pajina PR, kinta ne’e (20/10).

Ba Xefe Estadu, Timor-Leste rejista avansu maka’as iha relasaun diplomátika, maibé presija aposta iha àrea komérsiu no ekonómiku.

“Ministériu Ekonomia, Komérsiu no Indústria hatene oinsa Timor-Leste sosa no importa foos husi Kambódia, bele karun oituan maibé kualidade di’ák no garante fornesimentu alternativu tanbá dala ruma iha krize bo’ot ruma, Vietname mós la konsege halo explortasaun ba ita, ne’e duni, Timor tenke diversifika rai ne’ebé importa foos nuudár alimentu importante ba povu,” Xefe Estadu fundamenta.

Aleinde, Prezidente Repúblika mós konvida Liurai  Kambódia, Narodom Sihamoni atu vizita Timor-Leste.

‘’Buka mos investimentu ho seitór privadu nasionál no internasionál bazeia iha Kambódia, buka sira nia investimentu iha área agrikultura no turízmu iha Timor-Leste. Primeiru-Ministru Hun Sen vizita ona Timor-Leste, ohin ha’u konvida mós Sua Majestade, Liurai Kambódia atu vizita Timor-Leste no Nia simu ho laran konvite ne’e,”  informa Horta.

Nune’e, Timor-Leste no Kambódia sei assina akordu kona-ba servisu áereo, hodi permite voo mensal husi Phnom Penh mai Díli, hodi fasilita passajeiru husi Xina mai Timor-Leste, tanba paíz ne’e jeográfikamente besik liu Xina.

Enkontru ne’e, ko’alia mós kona-ba adezaun ba ASEAN, tanba Kambódia apoia adezaun Timor-Leste nia integrasaun ba organizasaun rejionál ne’e iha tinan 2023.

Enkuantu, Prezidente Repúblika mós sente kontente ho resepsaun vizita husi Aeroportu Phnom Penh to’o Otél.

Entretantu, tuir ajenda, Xefe Estadu sei hasoru malu mós ho senadu Reiñu Kambódia, entidade militár, seitór privadu no alta entidade seluk.