Diretór Jéral Terras no Propriedades, Lucas António da Costa hateten, tuir lei númeru 01/2003 katak, rai ka propriedade ne’ebé identifika ona nuudár rai Estadu, mak kualkér sidadaun hakarak okupa, Estadu sei notifika nia durante loron-tolu-nolu (30).

“Prosesu ne’e la’o tuir prosedimentu, ita fó ona notifikasaun bá dala-uluk, husi parte okupante la kumpri, fó tán nofitifikasaun ikus. Notifikasaun husi Ministériu Justisa ita fó loron sanulu, sira la kumpri nafatin,”dehan nia ba Jornalista sira iha Markoni, kinta ne’e (20/10).

Nia hatutan, bainhira okupante sira la kumpri nafatin, Estadu sei fó tán notifikasaun ho prazu tempu durante loron-sanulu (10).

Enkuantu, kazu rai Markoni, okupante rai Estadu ne’e la obedese bá notifikasaun ikus ne’ebé Governu liu husi MJ fó ho númeru 61.

Ho nune'e, razaun legál hirak ne’e mak MJ liu husi SETP deside sobu obrigatóriu kalén ho lutu ne’ebé didin iha rai Markoni.

Nia hatutan, antes ne’e, okupante ne’ebé simu notifikasaun hosi MJ hato’o mós rekursu maibé SETP indefere, tanba prazu liu ona, nune’e ezekuta órden Governu hodi tun direta bá terrenu, tanba rai ne’e pertense bá Estadu.

“Ida-ne’e, atu kalén ka besi fali mós ami subu hotu, fila-fali bá situasaun normál. Rai ne’ebé uluk mamuk, ne’e rai Estadu nian. Ne’e liu tiha ona loron sanulu, kompleta ona loron sanulu, ami sente katak, dalan laiha, dalan mak ne’e tenke mai hamamuk. Tan ne’e, ekipa sira tun obrigatóriu, husu atu hamamuk fatin ida-ne’e.

Ho nune’e, nia dehan, ba parte ne’ebé okupa rai ne’e mak sente la kontente ho prosesu ne’ebé SETP hatun mai, bele lori bá Tribunál.

Entretantu, tuir observasaun husi Online INDEPENDENTE, iha terene nota katak, bainhira ekipa sira sobu lutu iha rai Markoni ne’e, hetan mós seguransa husi Polisia Nasional husi Eskuadra Dom Aleixo no PSIK.