Prezidente Komisaun B, José Agostinho Sequeira 'Somotxo' hatete, komisaun labele simu relatóriu rezultadu outopsia no investigasaun ba kazu padre Abito nia mate no José Bernardo ne'ebé tara aan iha sela Komandu Dili.

"Hanesan rezultadu autópsia no investigasaun agora dadaun iha ona Ministériu Públiku, maibé rezultadu autópsia la'ós atu fahe ba ema hotu-hotu hatene, maibé ne'e só Ministériu Públiku mak na'in ba justisa, sira mak sei fó sai nia rezultadu," dehan nia, iha Parlamentu Nasionál, Kuarta (19/10).

Kazu ida ne'e, tuir Somotxo, nia rezultadu mak iha rua de'it, susidiu ka omisidiu ida-ne'e mak aban-bainrua Ministériu Públiku.

Nia haktuir, maibé kazu Amu Abito nian ne'e, komisaun simu infromasaun katak prosesu investigasaun la'o hela.

"Amu nian ne'e nia komplikasaun la hanesan joven ne'ebé mak mate iha sela, konforme PSIK hateten. Ninia rezultadu hotu Ministériu Públiku mak sei fó sai. Ami komisaun B labele to'o ida ne'e, se mak oho, tanba saida mak mate. Ida-ne'e aban-bainrua Ministériu Públiku sei fó sai," Nia relata.

Nia afirma, tanba rezultadu hot-hotu iha ona Ministériu Públiku, agora hein de'it.

"La'ós família de'it, maibé ita hotu hein rezultadu finál, ami nia ezijénsia mak investigasaun ne'e tenke transparénsia atu ita bele hatene katak mate ne'e, ema mak oho ka hanusa, ida-ne'e mak aban-bainrua ita sei hetan," Nia informa.

Prezidente Komisaun A, Joaquim dos Santos hateten, rezultadu autópsia nian ne'e bele loke iha Tribunál.

"La loke iha familia nia oin ka la loke iha Prezidente Repúblika nia oin, ne'e labele, autópsia ne'e halo, aguarda desizaun Tribunál, kuandu provas fraku mak loke autópsia," Nia haktuir.

Joaquim haktuir, labele hanoin katak ba halo autópsia atu fó rezultadu ba família, laiha ida. Tanba ne'e segredu justisa nian.

Vise Prezidente Bankada CNRT, Patrocino Fernandes dos Reis hateten, hanoin buat ida Justisa ni'an, husik autór justisa sira halo servisu.

"Nu'udar reprezentante povu bolu atensaun nafatin, halo kontrola nafatin atu autór justisa sira ne'e halo servisu ho profisionál, imparsialidade, depois lori justisa ne'e ba oferese povu," Nia dehan.

Nia haktuir, maibé la'ós kompeténsia Parlmentu nasionál atu hateten katak ida-ne'e mak loos ka ida ne'ebá mak sala.

"Maibé interese mak ne'e nu'udar reprezentante povu ezije ba Instituisaun Estadu nian liuliu autór justisa sira ne'e atu lori justisa ba povu ho lalais, tanba povu labele hein ida-ne'e," kata nia.

Purtantu Ministériu Públiku (MP) liu husi Prokuradór Titulár, Jacinto Babo, delega ona kompeténsia ba Polísia Siéntifiku Investigasaun Kriminál (PSIK), hodi kontinua loke investigasaun ba kazu asidente tráfegu ne’ebé hamate Padre Abito José Brites Casimeiro, iha área Dare, Postu Administrativu Nain-Feto, Munisipiu Dili, segunda (22/8).

Nune'e mós  Ministériu Públiku (MP) liu husi Prokuradór Titulár, Jacinto Babo, delega ona kompeténsia ba Polísia Siéntifiku Investigasaun Kriminál (PSIK), hodi kontinua loke investigasaun ba José Bernardo nia-mate iha sela detensaun Komandu Polisia Nasionál Timor-Leste (PNTL) Munisípiu Dili.