PR Horta hato’o votus kmanek Idul Adha 2024 Featured

By Cristina Ximenes Juñu 19, 2024 583
Foto:Media PR. Foto:Media PR.

DILI: Prezidente Repúblika, José Ramos Horta, lori povu Timor-Leste nia naran hato'o votus kmanek ba musulmanu sira iha Timor-Leste hotu iha okaziaun ksolok Idul Adha 2024.

Xefe Estadu dehan, Idul Adha fó hanoin kona-ba lisaun kle'an sira ne'ebé aprende husi istória dispozisaun profeta Ibrahim hodi sakrifika nia oan-mane obediénsia ba ordem Maromak nian. 

"Hodi povu Timor Leste nia naran, ha'u hato'o ha'u-nia votus kmanek liu ba imi hotu iha okaziaun Ksolok Idul Adha 2024. Idul Adha fó-hanoin mai ita kona-ba lisaun kle'an sira ne'ebé ita aprende husi istória dispozisaun profeta Ibrahim hodi sakrifika nia oan-mane obediénsia ba ordem Maromak nian. Tempu atu refleta kona-ba valór sira husi ita-nia an rasik, devosaun, no Forsa husi ita-nia konviksaun," Mensajen PR Horta iha Palasiu Prezidensiál Bairu-Pite, Segunda (16/06).

Nune'e, iha loron ne'e, PR Horta hakarak rekoñese kontribuisaun ne'ebé boot husi maun-alin no inan-feton Musulmanu sira-nian ba sosiadade Timor-Leste.

“Imi-nia komitmentu ba fiar, família, no komunidade sira-ne’e hala'o ona papél importante ida hodi forma nasaun nia identidade no haburas espíritu unidade no komprensaun.”

"Ho ita selebra okaziaun Ksolok ida ne’e, mai ita hatutan fali ita-nia komitmentu ba relijiaun nia armonia no respeitu malu. Iha Timor-Leste, ita orgullu tebes ho ita-nia diversidade no ko-ezisténsia pasifika husi fiar oioin. Ha'u hein katak Idul Adha ida-ne'e bele hametin liután relasaun irmaun-irman sira-nian iha sidadaun hotu-hotu nia leet, la haree ba sira-nia fiar relijioza," hatete nia.

Tanba, durante selebrasaun ida-ne'e, mai hanoin-hetan mós maluk sira ne'ebé iha susar nia laran no fó apoiu no laran-sadi'a ba sira. Idul Adha nia esensiál loos mak fahe bénsaun no lori ksolok ba ema seluk nia moris.

"Dala ida tan, ha'u hato'o ha'u-nia votus kmanek ba imi hotu ne'ebé selebra Idul Adha ho haksolok, dame, no prosperidade. Hein katak Idul Adha nia espíritu sei lori ksolok, unidade no kumprimentu espirituál ba Musulmanu sira iha Timor-Leste no mundu tomak," katak nia.

Rate this item
(0 votes)

Independente Digital TV

Tuir ami iha Twitter

Kalendariu Notisia

« July 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31