Xefe Estadu hatete, EUA hala'o papél signifikativu iha prosesu Restaurasaun Independénsia Timor Leste iha Maiu 2002. Husi tempu ne'ebá, hahú kooperasaun no parseria ne’ebé enkoraja hodi fahe valór sira demokrasia, direitu umanu no estadu-de-direitu, ne'ebé habelar liuhusi implementasaun programa dezenvolvimentu USAID nian, departamentu estadu, ajensia komérsiu no dezenvolvimentu, defeza no justisa, korpu pás, seabees no kompromisu Millennium Challenges Corporation (MCC) ho investimentu tokon US$ 420 iha setór infraestrutura no edukasaun.
"Nomeasaun Embaixadór José Luís Guterres, diplomata ho envolvimentu polítiku tempu naruk iha Timor Leste dezde tinan-1974, sai hanesan Vise Primeiru Ministru no Ministru Negósius Estranjeirus no Kooperasaun, Reprezentante Permanente Nasoins Unidas nian ne'ebé hetan akreditasaun hanesan Embaixadór la'ós Rezidente iha Estadus Unidus Amérika, hatudu kompromisu Timor Leste nian atu hasa'e no hametin liután kooperasaun bilaterál no amizade entre nasaun rua ne'e," dehan PR Horta, iha Palasiu Prezidensiál, Bairru-Pité, Sesta (19/1).
Xefe Estadu hatete, importánsia hodi mantein relasaun forte ho Estadus Unidus, tanba nia influénsia globál iha ámbitu kulturál, diplomátiku no ekonómiku. Preokupasaun kona-ba neglijensia iha pasadu, Prezidente Repúblika hatete, presiza revitalizasaun relasaun, liu-liu ho Kongresu Amerikanu no sosiedade ne'ebé luan liu.
Xefe Estadu aprezenta dezafiu no oportunidade atu envolve ho entidade sira ne’ebé iha influénsia hanesan mídia, liuliu iha sidade xave sira hanesan Washington no Nova Iorke.
Nune'e, Xefe Estadu hato'o nia konfiansa ba Embaixadór José Luís Guterres nia dedikasaun no esforsu, ne’ebé tuir nia, sei kontribui ba susesu no pozisaun jerál Timor Leste nian iha nivel internasionál.
Iha fatin hanesan, Embaixadór EUA, José Luís Guterres informa, ihin loron ne'e hanesan loron ida ne'ebé importante tebes ba nia simu nomeiasaun Prezidente Repúblika atu sai Embaixadór RDTL nian iha EUA, ho sentidu responsablidade.
"Ha'u fiar katak konfiansa ne'ebé Prezidente Repúblika nonu governu ne'ebé fó bele reprezenta Timor iha EUA signifika ha'u esforsu kontinuadu atu reforsa tan relasaun ne'ebé ita iha, relasaun di'ak ho Estadu Unidus Amérika. Ha'u ne'e kareira diplomátika hamutuk ho diplomata MNEK, maibé iha 2006 atuál Prezidente Repúblika telefone ba Nova Iorke husu ha'u, LUGU ita bo'ot ha'u primeira eskolla sai MNEK. Ami diskute uitoan tanba presiza ita nia rain, ita nia povu ha'u mai, hatene katak polítika nasionál la'ós fasil," hatete nia.
Nia haktuir, polítika nasionál presiza tama polítika atu bele influénsia mudansa iha rain, ne'ebé 2006 to'o ohin buka funsaun ne'ebé imi hatene ona iha governu últimu nian iha Parlamentu Nasionál no Oekusse.
Tanba ne'e, fó ondra bo'ot ida ba nia, iha oportunidade atu serve povu Timor Leste, no ohin loron dekretu nomeiasaun Prezidente Repúblika hatun fali kna'ar ida atu sai fali hanesan diplomata ba iha EUA, nia sei halo buat hotu atu serve ho lealidade povu Timor Leste nia interese.
"Ami reuniaun uitoan ho Prezidente Repúblika ko'alia mós kona-ba servisu ne'ebé atu hala'o iha EUA, tanba Xefe Estadu uluk nia reprezenta ita nia rezisténsia iha EUA no Nasaun Unidas esperénsia ne'ebé nia iha transmite ba ami, no ha'u simu ho laran kmanek. Sertamente iha EUA sei kontinua nafatin servisu di'ak ne'ebé uluk Prezidente Repúblika no Embaixadór sira ne'ebé akreditadu ba EUA, tanba presiza reforsa relasaun amizade no relasaun kooperasaun ho nasaun ida bo'ot tebe-tebes iha mundu ne'ebé ohin loron pratikamente lidera teknolójia hanesan ha finansas, hanesan Timor presiza relasaun di'ak ho sira," dehan nia.
