PM Agradese, TL Sai Membru OMK iha Fevereiru 2024 Featured

By Mariano Mendonça Janeiru 22, 2024 784
Primeiru Ministru (PM), Kay Rala Xanana Gusmão hala'o enkontru ho Diretora Jerál Organizasaun Mundiál Komérsiu, Ngozi Okonjo-Iweala, iha Suiza. Foto:Media GPM. Primeiru Ministru (PM), Kay Rala Xanana Gusmão hala'o enkontru ho Diretora Jerál Organizasaun Mundiál Komérsiu, Ngozi Okonjo-Iweala, iha Suiza. Foto:Media GPM.

DILI: Fulan Fevereiru tinan ne’e, Timor Leste (TL) sai ona membru Organizasaun Mundial Komersiu (OMK), ne’e duni Primeiru Ministru (PM), Kay Rala Xanana Gusmão agradese ba esforsu Diretora Jerál Organizasaun Mundiál Komersiu (OMK) ne'ebé dudu prosesu ne’e hotu.

Apresiasaun ne’e hato’o husi Xefi Governu hafoin partisipa Forum Ekonómiku Mundiál, liu husi hala’o enkontru ho Diretora Jerál Organizasaun Mundiál Komérsiu, Ngozi Okonjo-Iweala akompaña husi Embaixadora no Reprezentante Permanente Misaun Timor-Leste nian iha Jenebra, Maria de Lurdes Martins de Sousa Bessa

Governu Timor-Leste hala’o ona reuniaun Grupu Traballu da-hitu hodi hatudu progresu iha loron 11 Janeiru 2024, marka pasu krusiál bá Timor-Leste antes Konferênsia Ministeriál OMK nian bá dala 13 (MC13) ne’ebé sei akontese iha loron 26 to’o 29  Fevereiru 2024 iha Abu Dhabi,  Emiradus Árabes Unidus, hodi simu pedidu Timor-Leste nian  sai membru OMK.

“Ha’u hala’o mós ekontru ho Diretora Jerál WTO, senhora Ngozi Okonjo-Iweala nia elojia ita nia eforsu no ha’u mós agradese tebes ba ninia kontribuisaun dudu prosesu ita nia iha fevereiru (2024) agora iha Abu Dhabi bele asina ona akordu ita sai membru Organizasaun Mundiál Komérsiu,” haktuir iha komunikadu imprensa ne'ebé Jornalista Independente asesu husi Mídia Gabinete PM, (20/01).

Iha fatin hanesan, Embaixadora no Reprezentante Permanente Misaun Timor-Leste nian iha Jenebra, Maria de Lurdes Martins de Sousa Bessa hato’o agradese tanba servisu ne’ebé nia parte hala’o kontinua lori Timor-Leste marka ona pasu signifikativu iha jornada integrasaun ekonómia globál ne’ebé konklui ona ho sussesu liu husi Reuniaun Grupu Traballu dahitu hodi adere bá OMK.

“Grasa dedeus ho  servisu ida boot tebe-tebes ho esforsu koletivu ida ho ita nia governu too ekipa tekniku sira hotu ho apoiu hosi WTO nia rasik ita konsege duni kompleta prodesu servisu para hodi konfirma ita nia adezaun ne’ebé marka ona ba loron 26 to’o 29  fevereiru 2024 iha Abu Dhabi,  Emiradus Árabes Unidus, hodi simu pedidu Timor-Leste nian  sai membru OMK,” dehan Komunikadu.

Momentu importante ne’e  nu’udár pasu krusiál iha jornada Timor-Leste nian hodi sai membru  plenu ba organizasaun komersial globál ne’e.

Asuntu seluk tan ba servisu ne’ebé Embaixadora Lurdes Bessa hala’o  maka reprezenta Timor-Leste iha Organizasaun Nasoes Unidas (ONU), Suiça no Monaco hodi servisu no koopera hamutuk ho organizasaun internasionál sira hodi luta ba kestaun direitu umanus nian.

“Servisu ne’ebé ita hala’o mezmu sede iha Jenebra, maibé ita fokus ba servisu iha Organizasaun Nasoes Unidas  asuntu boot ida ne’ebé ita trata maka direitus umanus. Ita hatene katak, fofoun ita atu kandidata aan ba Membru Konsellu Direitus Umanusba tinan 2024-2026, maibé ita adia ba 2026-2029 ne’e para fó tempu ba ita prepara aan di’ak liután hodi prepara ita nia kandidatura ne’e,” informa Komunikadu.

Dadaun ne’e Embaixadora Lurdes ho diplomata feto Timoroan na’in-rua inklui sidadaun estranjerus ida maka hala’o servisu iha Jenebra hodi apoia servisu reprezentasaun Timor-Leste nian.

Rate this item
(0 votes)

Independente Digital TV