Nune'e, Xefe Estadu husu ba embaixadór sira hodi estadu no rai ne’e nia naran agradese ba hotu-hotu nia disponibilidade atu servi rai ne’e iha país sira ne’ebé sei ba hala’o misaun diplomátika hodi representa Estadu Timor Leste.
Tanba, Embaixada reprezenta Xefe Estadu, representa mós governu no nasaun ida ne’e, tan ne’e aspetu hotu ne’ebé sai hanesan imagem Timor-Leste nian iha país sira ne’ebé embaixadór sira sei representa ba importante atu promove hodi kontribui ba nasaun ne’e nia dezenvolvimentu.
Nia afirma, nasaun hotu-hotu importante ba Timor-Leste, balun ne’ebé Timor-Leste estabelese ona embaixada no balun seidauk maibé hotu-hotu importante no nasaun balun sei hein sira nia akreditasaun konstituitivamente molok ita estabelese Embaixada iha ne’eba.
“Embaixadór sira tenke servisu ho kompeténsia, dedikasaun no seriédade, ba Embaixadór no Embaixadóra sira hamutuk ho funsionáriu sira embaixada nian tenke iha responsabilidade no iha relasaun servisu husi loron ba loron atu bele hatan ba nesésidade sira iha país ne’e nian no halo buat ne’ebé diak ba povu Timor-Leste," dehan PR Horta, iha Palásiu Prezidensiál Nicolau Lobato, Bairru-Pité, horisehik.
Xefe Estadu reforsa, atu embaixadór sira bele ko’alia konkretamente kona-ba prióridade sira Timor-Leste nian, iha kada país ne’ebé Timor Leste estabelese embaixada hodi define relasaun multilaterál no bilaterál entre Timor-Leste no país sira seluk.
“Nune’e felisita ita-boot sira, dezeju susesu ba imi hotu, ita-boot sira-nia susesu hanesan país ne’e nia susesu," hatete nia.
Entretantu, Vise Ministra asuntu ba ASEAN, Milena Rangel hateten, Timor Leste liu husi Prezidente Repúblika fó tomada-de-pose ba embaixadór TL nian na'in neen ba misaun permanente misaun Nasaun Undas, Repúblika Indonézia, Brazil, Santa-Sé, Repúblika Singapura no Laos.
Nia haktuir, Xefe Estadu fó posse ba Embaixadór na'in neen, tanba embaixadór sira ne’ebé halo hela misaun iha nasaun sira ne’ebé iha sira nia misaun remata ona no besik atu fila fali mai Timor Leste.
“Embaixadór sira ne’ebé halo misaun diplomátika iha liur atu fila ona tanba ne’e, nomeia fali embaixadór foun sira ne’e atu ba prienxe fali vaga xefe misaun embaixadór sira nian iha nasaun sira ne’ebé dezigna ba," haktuir nia.
Nia esplika, mandatu ba embaixadór no embaixadora sira ne’ebé ohin simu posse ho durasaun tinan tolu, maibé depende nesésidade, bainhira nesesita bele halo extensaun.
Embaixadór Timor Leste na'in neen ne’ebé simu posse husi Prezidente Repúblika José Ramos Horta hodi hala'o misaun diplomátika hanesan Dionísio da Costa Babo Soares hanesan Embaixadór Timor Leste ba misaun permanente ba Nasoens Unidas, António da Conceição Embaixadór Timor Leste ba Repúblika Indonézia, Maria Angela Guterres Viegas Carascalão Embaixadora Timor Leste ba Repúblika Federativa Brasil, Filomeno Aleixo da Cruz Embaixadór Timor Leste ba Repúblika Populár Laos, Chole Dindo Embaixadóra Timor Leste ba Estadu Sidade Vaticano no Alexandre Vital da Cruz Araújo Embaixadór Timor Leste ba Repúblika Singapura.
