PM Xanana hatete, ida ne’e mós mak sei permite atu ensera (ka, taka) vijênsia OJE 2023, iha 31 Dezembru no bele ona hahú Tinan foun 2024 ho ninia orsamentu Estadu rasik.

La'os de'it ida ne’e maka hakarak, mais ida ne’e mak bele benefisia País. Ne’e hotu representa, duni, esforsu ne'ebé substansial (ka, boot) husi Parlamentu Nasionál no husi Governu rasik, ne'ebé iha fulan neen nia laran, haka’as aan no bele debate Programa Governo, Orsamentu Retifikativu no, agora, Orsamentu Jerál Estadu.

"Ita nia Povu merese katak ninia Governantes sira no Instituisoens Públikas sira hotu tenki servisu ho lalais, ho efisiensia no ho responsabilidade. Povu timor merese atu prioridades ne'ebé define ona ba próximu anu, tenki komesa implementa daudauk ona iha tinan foun nia hahú, sem duodésimus, sem insertezas ka atrasus iha implementasaun ba polítikas sira ne'ebé hasai tiha ona iha Programa," dehan PM Xanana, iha Parlamentu Nasionál, horisehik.

Nia afirma, ne’e hotu só bele akontese bainhira instituisaun demokrátika Estadu koopera ba malu ba defesa interese povu nian.

"Ha’u mós sinte ksolok, tanba haree katak Ita fila-fali ona ba dalan ne'ebé di'ak kona-ba konsolidasaun exersisiu Demokrátiku, liu husi Dialogu, kooperasaun no husi interasaun institusionál, nu'udar prinsípius fundamentais atu atinje ka, hetan projetu ida ne'ebé komun, maka atu promove desenvolvimentu ekonómiku no sosiál iha Timor-Leste," nia dehan.

Tuir nia, hamutuk ho valores ba boagovernasaun, transparansia no kona-ba responsabilidade finanseira no administrativa, valores ne'ebé Governu ida ne’e inkute ka hatama iha prosesu orcamentais.

"Ita tenki rekoñese katak Kooperasaun institusionál entre Órgaun de Soberania, mak sei kontribui atu Reafirma Estadu Direitu Demokrátiku, nu'udar lema (ka, hanoin no hakarak) boot ida ba IX Governu konstitusionál," tenik PM.