PR Horta dehan, mas agora kadaves forsa iha primeiru traning, formasaun ofisiál jerasaun foun ne'ebé formadu iha Timor Leste, Portugál, Austrália, Amérika.
"Primeiru ita haree iha tinan 22 nia laran desde independénsia to'o agora dezenvolvimentu di'ak tebe-tebes, liu fali uluk ha'u nia hanoin tanba uluk kursu laiha liu, orsamentu laiha buat hotu-hotu, doadór ruma mak fó. Mas agora kadaves ita nia forsa iha primeiru trening, formasaun ofisiál jerasaun foun ne'ebé formadu iha Timor Leste, Portugál, Austrália, Amérika. Maibé ne'e sei presiza barak liu tan, ofisiál superiór, ofisiál nivél maijór, kapitaun, tanba komandante sira ne'ebé ho autoridade, nivél Tenente Koronel, sira ne'ebé mai husi luta ne'e tanba idade tinan lima tan, ita bele hanoin laiha ona," dehan nia, iha Kuartel Jerál Fatuhada, horisehik.
Nia afirma, purtantu sira hotu iha direitu ba deskansa entaun Forsa Armadas tenke aselera formasaun ofisiál, iha nivél hotu-hotu, ofisiál ba operasionál, ofisiál ba jestaun, planeamentu, ne'e Forsa Armadas modernu la'ós simples, kompleksu, tenke iha sistema manutensaun didi'ak, progressu barak loos, haree tinan 20 nia laran, entaun ha'u kontente ho ida ne'e, depois kestaun ida fali disiplina F-FDTL kuaze nunka rona iha problema.
Maibé, devez enkuandu iha ida ka rua, hanesan mós PNTL instituisaun rua ne'e haree ba buat ida ne'ebé di'ak liu ba nasaun ida bainhira Forsa Armadas, polísia nia komportamentu di'ak, respeitu povu, respeitu sidadaun iha Timor kuaze laiha problema, tiru mate ema arbiru, torturasaun ema arbiru, dala ruma akontese violénsia ruma.
Nia argumenta, mas ne'e tinan ida bele akontese dala ida, bainhira elementu ida ba festa ruma lanu, purtantu buat ne'ebé ha'u admira tebe-tebes iha Forsa Armadas mak ne'e disiplina, respeitu ba lei, ba povu.
Entretantu, Eis Tenente Jenerál F-FDTL, Lere Anan Timur hatete, dezenvolvimentu iha F-FDTL nei-neik mas la'o nafatin, tanba Timor la'ós únika instituisaun F-FDTL.
"Ha'u hanoin katak nei-neik mas ita dehan la'o nafatin tanba iha Estadu Timor la'ós únika instituisaun F-FDTL, iha instituisaun barak, iha atividade barak mak ita nia governu, estadu halo. Labele fó de'it atensaun ba ita nia Forsa Defeza, maibé mós ba área sira seluk, mas ha'u bele dehan Forsa Defeza seguransa prióridade, primeiru hanesan uluk ha'u dehan bem estar Forsa Armadas nian," dehan Lere.
Nia hatete, hanesan mós ba polísia, segundu kria kondisaun atu sira bele hala'o sira nia kna'ar nu'udar luta ba nasaun.
"Ha'u iha li'ur ona ha'u haree ba situasaun polítika, situasaun ekonómika, situasaun sósiu ekonómiku, ha'u dala ruma ko'alia ba komandante balun ha'u dehan bele aban bainrua Forsa Defeza ho polísia labele husik malu, funsaun rua ne'e bele dupla funsaun. Tanba ita nasaun kiik, ita osan mós menus entaun sira na'in rua halo dupla funsaun, hanesan agora daudauk halo atividade konjunta, mas presiza lei ida forsa rua ne'e halo dupla funsaun, tanba polísia nasionál ninia atividade seguransa interna maibé hotu-hotu kaer kilat, bainhira funu ruma ne'e polísia labele interven kilat, tanba ha'u propoin aban bainrua ha'u sei ko'alia Prezidente Repúblika bele forsa rua ne'e halo dupla funsaun," tenik nia.
