TMR dehan, aproveita informa asidente ne'ebé nia hetan iha Atambua ba Xefe Estadu atu hatene, tanba asidente ne'ebé akontese iha viziñu.

"Primeiru lugar agradese ba Prezidente Repúblika José Ramos Horta tanba nia konvida ha'u, Xefe Estadu dehan ami ko'alia asuntu barak mais ha'u aproveita informa asidente ne'ebé ha'u hetan iha Atambua ba Xefe Estadu atu hatene, tanba asidente ne'ebé akontese iha viziñu entaun ha'u informa mak ida ne'e," dehan nia, iha Kantina Matak, Palasiu Prezidensial, horisheik.

Nia dehan, asidente ne'e akontese ne'e sira la planu, TNI mós la planu sóke sira, entaun TMR husu atu taka kazu no mós husu atu labele kastigu kondutór ne'ebé sóke nia karreta.

"Ha'u husu atu taka kazu no mós husu atu labele kastigu kondutór ne'ebé sóke karreta, no husu mós sira atu respeita regras tranzitu nian," hatete TMR.

TMR esplika, tanba iha karreta tolu mak iha ninia oin, Polri nia karreta, konsoladu nia karreta mós ninia seguransa nia karreta, sira mai sóke loos ninia karreta.

"Ha'u hanoin rezolve ona, ha'u hasoru komandante battalaun 744 konsoladu ita nian, Polri prosesu sira nia internu ne'e ha'u la hatene, maibé ida ho ha'u husu atu taka. Ha'u ba Oekusse, fila husi Oekusse mai, ha'u nia atividade partidu nian ha'u fila mai mak soke," hakotu TMR.

Entretantu, iha fatin hanesan Prezidente Repúblika José Ramos Horta hatete, nia mak hakarak ko'alia ho maun bo'ot Taur Matan nu'udar veteranu, eis Prezidente Repúblika, eis PM ko'alia asuntu oioin inklui ko'alia kona-ba foin daudaun nia viajen ba Oekusse, fila mai asidente sira ne'e.

"Ha'u mak hakarak ko'alia ho maun bo'ot Taur Matan Ruak nu'udar veteranu, eis Prezidente Repúblika, eis Primeiru Ministru ko'alia kona-ba situasaun oioin iha ne'e, iha mundu atu troka impresaun, ho líder ida ne'ebé ha'u respeita. Hanesan ko'alia rileks informasaun tanba ne'e enkontru iha Kantina atu maun bo'ot Taur Matan Ruak koñese no haree. Ami ko'alia situasaun iha rai laran ladún mas ko'alia hanesan foin daudaun Eis Prezidente Repúblika, Eis Primeiru Ministru Taur Matan Ruak hatete kona-ba nia viajen ba Oekusse, fila mai asidente sira ne'e," dehan PR Horta.

PR Horta haktuir, akontese ne'e iha Dili ne'e loro-loron akontese asidente sira ne'e, oho F-FDTL, oho PNTL, karreta baku fila akontese.

Nia dehan, TNI rigorózu tebetebes kuitadu kondutór ne'e tanba ne'e mak maun bo'ot Taur Matan Ruak hatete ba sira favór lalika kastigu nia, tanba ne'e TMR nia fuan hatudu sentidu estadu maneira resolve.

PR Horta reforsa, tanba estrada dala ruma klot bele hetan asidente barak, dala ruma motorista balun hanesan hatene Timor kuaze loro-loron asidente oioin.

"Ha'u mós nunka haree iha média kona-ba asidente ne'e, ha'u simu informasaun kedas ha'u hatene husi maun bo'ot Taur Matan Ruak rasik fotográfia buat sira ne'e ha'u hatene kedas prosesu la'o hela. Ha'u konkorda ho Eis Primeiru Ministru ha'u hatete ne'e hatudu ita nia sentidu estadu, agora sira taka duni ne'e ita la hatene sira nia disiplina militár la halimar mas kuitadu motorista sira ne'e mós ema kiik ida, ema simples ida, sorti asidente la bo'ot," tenik nia.

Antes ne'e, iha loron 22 fulan Jullu 2024 Eis Prezidente RepúblikaTaur Matan Ruak ne'e hetan asidente viasaun kiik ida iha área Atambua-Indonézia nian, bainhira ho ekipa iha dalan atu fila hikas mai Dili via terrestre husi Oekusse.

Asidente soke ne'e akontese kuaze tuku 10 liu oras Indonézia (WITA), iha área Suskoe, Atambua, involve hosi Karreta Militar Indonézia (TNI) nian ho marka Isuzu hosi Yonif Raider 744/SYB, soke iha parte liman loos besik motorista tur ba. Iha akontesimentu ne'e, Eis Prezidente Taur Matan Ruak ho nia kondutor no muska iha kondisaun di'ak no la hetan kanek ruma, maibé Karreta mak nakbetok oituan besik parte kondutor tur ba.

Entretantu hafoin asidente ne'e, Responsável TNI hosi Yonif Raider 744, Polísia Tranzitu Atambua, Konsular-TL mai hamutuk rezolve iha Konsuladu Timor Leste nian iha Atambua.

Iha prosesu rezolve ne'e, parte Responsavel TNI nian hosi Yonif Raider 744 husu deskulpa ba Eis Prezidente Repúblika Taur Matan Ruak ba asidente ne'ebé la espera no prontu responsabiliza ba nia membru nia neglijénsia. Iha sorin seluk, Eis Prezidente Repúblika Taur Matan Ruak fó perdaun ba motorista ne'e no husu ba parte Komandu TNI Yonif Raider atu taka kazu refere no husu mós atu lalika kastigu nia membru ne'e, maibé husu atu hadi'ak de'it mak karreta Honda Livina ne'ebé mós hetan soke hamutuk iha asidente refere.

Hafoin rezolve tiha, Eis Prezidente Repúblika ho komitiva kontinua viajen mai Dili.