Eis Xefe governu ne’e dehan, auditoria nu’udar prosesu normal ida bainhira mosu duvida ba lideransa ka governasaun anterior.

"Auditória prosesu ida normal. Ha'u laiha problema ba ida ne'e. Tenke halo auditória bainhira iha dúvida, iha problema, tenke halo, ne'e normál," dehan Taur ba jornalista sira hafoin hasoru malu ho Prezidente Repúblika, José Ramos Horta, iha Kantina Matak, Palasiu Prezidensia Bairo-pite, Kuarta (24/07).

Hatan kona-ba nia sei kolabora ka lae bainhira auditoria ne’e lao, eis PM ne’e dehan, Timor-oan hotu-hotu tenke kolabora.

“Timor-oan hotu-hotu tenke kolabora, ne'e laiha sees an, ne’e ga,” dehan Taur.

Iha fatin hanesan, Prezidente Repúblika, José Ramos Horta dehan, PM Xanana hatete auditória ne'e só atu hatene de'it problema ne’ebé mosu laos atu halo persegisaun politika.

“La'ós motivasaun polítika, só par governu foun ne'e kompriende didi'ak sistema ne'e barak mak muda fali ne'e mak nia hatete. Hanesan maun boot Taur hatete daudaun (auditoria) ne'e normál, nono governu hakarak halo auditória," dehan PR Horta.

Molok ne’e, PM Xanana deklara iha enkontru semanál ho Prezidente Repúblika, José Ramos Horta, iha 18 Jullu katak, auditória internasionál ne’ebé Governu dasia sei halo atu hadi’a fali sistema ne’ebé uluk monta.

"Ho buat sira ne’e hotu mak ami hasai ona konkursu ba auditoria internasionál tanba ami la’ós hakarak persege malu,” dehan nja.

Xefe Governu esplika, auditória internasionál ne’e atu hatudu ba futuru lider katak buat hotu-hotu tenke tuir regra.

“Iha fali Governu seluk hakarak muda tuun no muda sa’e, muda halimar ba depois auditória sei mosu,” dehan Xanana.