Diretór Jestaun Merkadu Munisípiu Dili, Artur Henriques informa, iha fulan Agostu ne’e, Autoridade Munisipiu Dili (AMD) hamutuk ho Sekretariu Estadu Asuntu Toponomia no Organizasaun Urbana (SEATOU) sei halo fila fali operasaun hodi muda negosiante sira iha dalan-ibun.

Negosiante sira ne’ebé sei muda mak negosiante ambulante ne’ebé molok ne’e AMD ho SEATOU muda ona maibé sira okupa fila fali.

"Kona ba vendedór ambulante ne'ebé uluk ekipa SEATOU ho Jestaun Merkadu halo mudansa sira ikus mai sira okupa nafatin tuir planu iha fulan Agustu antes vizita Amu Papa Francisco mai iha Timor-Leste ami sei halo operasaun konjunta ida,” dehan Artur ba jornalista INDEPENDENTE, iha nia knar-fatin, Kuarta (24/07).

Negosiante sira iha dalan-ibun Kampung Baru, nia dehan, sei muda ba merkadu Manleuana no sira ne’ebé iha dalan-ninin Komoro sei muda tama ba antigu merkadu Komoro.

“Sira lokraik tuku 6 ba leten ne'e sira movimentu ona, hanesan antigu merkadu Komoro, Fatuhada, ba iha dalan kurzamentu atu sa'e Aimutin nian ne'e, ne'ebe ami hatene ona lokasi sira ne'e, iha fulan Agostu ba oin ne'e ami sei muda sai sira," dehan nia.

Tuir nia, iha preparasaun ba vizita Amu Papa Francisco ne’e, dalan-ibun sira iha kapital Dili, tenke moos.

"Agora ami prepara ba vizita Santo Padre ne'e ami hakarak sidade ne'e mós kedas, sidade labele foer hanesan sira halo, se sira la kumpre ami foti medidas seluk, medidas mak ami prende sira nia sasan, tanba ita simu bainaka kauze rihun 100 atu mai iha Timor ne'e, labele admira beibeik ho ita-nia hahalok sira ne'ebé mak la tuir regras," katak nia.

Entretantu, iha 8 Abril liu ba, ekipa konjunta ne'ebé lídera husi SEATOU sobu ona baraka 92 iha antigu merkadu Komoro.

Tuir observasaun Jornalista Jornál INDEPENDENTE iha terenu nota katak fatin sira ne'ebé ekipa SEATOU sobu daudaun ne'e negosiante sira okupa hikas.