Responsavel Servisu Sosiédade Sivíl no Asuntu Sosiál Gabinete Prezidensia Repúblika, Edio Raimor informa, Prezidente Repúblika fó apoia ona nesesidade bázika ba oan kian na’in-6, maibé sei kontinua observa sira nia kondisaun moris.
“Prezidénsia Repúblika forñese sasán apoiu sira-ne'e nu'udar parte ida husi prióridade Prezidente Repúblika ni’an, atu ajuda grupu sira-ne'ebé vulneravel. Ida-ne'e tuir proposta ne'ebé aprezenta husi INDDICA ne’ebé identifika oan kiak na'in-6 iha aldeia Riatu, Suku Daisua, Same liu husi apoiu ai-han bázika, foos saka 6, mina 5 litru jerigen ida, Deho kaixa ida, biskuit kaixa ida, sumasu 6, susu-been kaixa ida, masin kaixa ida, no sasán dapur hanesan tasu 2, sana, sasán ijiene hanesan eskova nehan kaixa 2, pastadente kaixa ida no sabaun nuvo kaixa ida. Aliende ai-han, sasán dapur no ijiene, ajuda mos kulsaun, manta boot no sapatu ba oan kiak sira hodi uza,” Informa Responsavel Servisu Sosiédade Sivíl no Asuntu Sosiál Gabinete Prezidensia Repúblika, Edio Raimor, liu husi Komunikadu Imprensa ne'ebé INDEPENDENTE asesu husi Palasiu Prezidensia Bairu-Pite, Kinta (07/12).
Nia dehan, Prezidénsia Repúblika forñese sasán apoiu sira-ne'e nu'udar parte ida husi prióridade Prezidente Repúblika nian atu ajuda grupu sira-ne'ebé vulneravel, ida-ne'e tuir proposta ne'ebé aprezenta husi INDICA ne’ebé identifika nesesidade oan kiak sira ni’an.
Nia informa, sei kontinua observa kondisaun moris husi oan kiak na'in-6 ne'e hodi bele haree posibilidade asisténsia adisionál ba sira-nia moris di’ak no edukasaun iha futuru. Maske apoiu ne'e uituan eh barak, maibé PR hakarak hatudu nafatin ninia domin bo'ot ba oan kiak sira.
Maibé kona-ba labarik oan kiak sira nia hela fatin ne'e liu husi apoiu ne'e ekipa tékniku sira sei haree hotu kondisaun hodi dokumenta no sei aprezenta ba Xefe Estadu. Tanba durante ne'e gabinete Prezidénsia Repúblika halo ona uma ba oan kiak sira iha fatin lubuk ida .
“Maibé ba sira-ne'ebé la hetan edukasaun, tanba kondisaun sei haree atu fasilita ba iha edukasaun ninian no sei tenta atu sira bele hetan edukasaun ida dignu,” Nia informa.
Entretantu, Sekretária INDDICA, Maria Odete Silva Belo hatete, organizasaun ne'e sei kontinua servisu hamutuk ho Ministeriu Edukasaun hodi nafatin halo advokasia ba direitu labarik sira ni’an.
Nia dehan, vizita oan kiak na'in-6 iha aldeia Loti, suku Diasua, tanba xefe suku sira relata informasaun katak iha oan kiak na'in-6 iha Riatu ne'ebé ema balun seidauk mai haree.
Entaun ho ida-ne'e to'o kedas mai fatin hodi identifika no haree diretamente sira nia kondisaun no rona labarik sira dehan la eskola hotu, tanba trauma hela ho intimidasaun ba sira inklui laiha materiál báziku ba sira hodi eskola.
Nia reforsa, fó ona apoiu no ba oin sei esforsu maka'as hodi husu Ministériu Edukasaun atu bele tau matan ba labarik sira-ne'ebé sei eskola hela.
Nune'e mós oan kiak, Lusiana Clara Dolozu hato'o obrigadu barak ekipa ne'ebé oferese ona ai-han ho fasilidade sira.
“Ba apoiu refere maske barak ka uituan ami simu ho liman-rua, tanba durante ne'e avó sira mak apoiu hela ami tantu ai-han no nesésidade sira seluk,” Nia informa.
