Prezidente Komisaun C trata Asuntu Finansas Publika, Cedelizia dos Santos informa, prosta OJE 2024 ho montante billaun $1.95, Komisaun espesializada sira iha PN halo ona audiénsia públika ho Governu no konklui ona iha 5 Dezembru ne'e.
Tan ne'e, tuir kalendariu ne'ebé determina ona, semana oin sei hahú debate iha faze jeneradidade tuir pedidu ne'ebe governu submete mai Parlamentu Nasional (PN) ho karater urijensia.
Tanba ne’e, nia hatutan, prosesu sira mós tenke habadak, no komisaun sira sei prepara paraser setorial.
"Tuir kalendariu loron 12 hahu tama ona ba diskusaun iha jeneralidade no espesialidade tuir orariu ne’e loron 5, no espera katak tuir orariu ne’ebé mak asina mós husi Prezidente loron 21 aprovasaun versaun final ba Orsamentu Jeral Estadu 2024, no loron 22 haruka ba Prezidente Republika hodi promulga,” dehan nia ba jornalista sira, iha PN, Kuarta (06/12)
Prezidente Komisaun C ne’e hatutan, debate espesialidade ne'e tau loron lima (5) maibé konforme husi proposta ne’ebé iha. Se proposta uitoan bele menus husi loron 5.
"Se karik iha proposta barak mós Komisaun C sujere atu prolonga mak oras ba diskusaun. Ezemplu, diskusaun hotu iha tuku 6 lorokraik bele prolonga to’o tuku 7 ka 8 kalan, nunee atu termina diskusaun tuir kalendariu ne’ebé iha ona."
Molok ne'e, iha 23 Novembru, Ministra Finansas, Santina Cardoso, aprezenta ona proposta-lei Orsamentu Jeral Estadu 2024 ho montante biliaun $1,95 ba Parlamentu Nasional (PN) ho karater urjensia.
