Konsellu Ministru aprova projetu rezolusaun Governu ne'ebé aprezenta husi Ministru Administraun Estatal (MAE), Tomas do Rosario Cabral, kona-ba doasaun veíkulu motorizada ba xefe suku sira ne’ebé ezerse ona mandatu durante tinan 2016 to'o 2023.

Atribuisaun ne’e hanesan rekoñesimentu ba sira-nia dedikasaun no empeñu ba interese públiku, manifesta iha serbisu ne’ebé dedika nafatin ba komunidade lokál sira.

"Governu deside atu fó títulu definitivu veíkulu motorizada ida ba Xefe Suku idaidak ne’ebé remata ona sira-nia mandatu iha loron 28 fulan Novembru tinan 2023 ka ba Xefe suku sira ne’ebé ezerse ona mandatu husi tinan 2016 to’o tinan 2023, maibé kontinua reeleita nafatin," informa komunikadu ne'ebé Jornalista Jornal INDEPENDENTE asesu husi media Gabinete Prezidensiá Konsellu Ministru, Kuarta (06/12).

Komunikadu ne’e hatutna, tanba idade no kondisaun motorizada ne’ebé utiliza husi Xefe Suku sira no hanoin ba kustu reparasaun relasiona ho valór patrimoniál ne’ebé tuun, Governu deside halo doasaun hanesan alternativa ida ne’ebé viavel liu.

Despeza sira kona-ba rejistu propriedade veíkulu motorizada no enkargu sira seluk nian sei responsavel husi Xefe Suku antigu sira ne’ebé sai benefisiáriu ba doasaun ne’e.