Diretor Klínika HNGV, Marcelino Correia informa, to’o ohin HNGV sei kontinua hasoru problema aimoruk.
“Stock aimoruk iha HNGV nafatin stock out. Ita-nia stock out aimoruk ne'e kuaze 20% mak laiha, ida ne'e la'ós de'it aimoruk maibé ita mós stock out ba konsumavel sira ne'ebé mak atu apoiu atendimentu ba pasiente sira," dehan Marcelino iha HNGV, Kuarta (06/12).
HNGV, nia hatutan, prepara ona lista aimoruk no konsumaveis hodi relata ba INFPM hodi bele atende.
“Bainhira stock aimoruk laiha afeita tebes ba pasiente sira, tanba ne'e ita buka meius oinsa mak bele responde hanesan sosa emerjensia ka foti fali husi fasilidade saude sira seluk iha munisípiu sira, atu nune'e bele apoiu ba pasiente sira," dehan nia.
Entretantu, relasiona ho preokupasaun Jornalista Jornál INDEPENDENTE halo konfirmasaun ba INFPM no Ministeriu Saúde, maibé responsavel husi parte rua ne’e la disponivel hodi fó informasaun.
