“Hakarak agradese ba Prezidente-da-Repúblika, tanba pedidu ne’ebé ha’u halo simples, maibé bele realiza iha tempu badak,” dehan Koordenador ba serbisu Voluntáriu, Orlando de Jesus, iha komunikadu ne’ebé Online INDEPENDENTE sita.

Enkuantu, apoia ne’ebé komunidade sira hetan husi gabinete presidensial ne’e, hanesan fo’os saka 40, mina lítru 25 no pakote alimentasaun seluk, inklui sasan dapur nian, hodi sustenta programa dada bee-mos.

Ba prosesu akizisaun materiál hanesan rai henek, besi, sementi, torneira no seluk tan, hodi uza ba kanalizasaun responsabiliza husi Programa Nasional Dezenvolvimentu Suku (PNDS), Munisípiu Aileu.

“Ami-nia bairu tanba do’ok husi suku, entaun autoridade sira foti desizaun hakarak fó osan husi PNDS nian atu dada be’e iha bairru ida ne’e. Tinan barak ona, ami sira ne’e desde ki’ik kedas la hetan be’e husi torneira, ami konsumu deit husi be’e matan, presiza la’o do’ok mak kuru, tan ne’e ami halo pedidu ba governu hodi fornese osan atu halo konstrusaun ba be’e moos,” haktuir Orlando de Jesus.

Entretantu, durante ne’e komunidade sira ho voluntariamente organiza malu hodi lalin sasan konstrusaun nian ba to’o be’e matan, nune’e komunidade sira serbisu ho voluntariu deit tan ne’e sira halo pedidu ba Prezidente Repúblika hodi apoia ai-han ruma atu bele atende ba sira nia servisu.