Tanba ne’e mak Governu Estadus Unidus Amerika liu husi Enkarregadu Negósiu, Tom Daley hamutuk ho Brigadeiru Jeneral Sarah H. Russ husi Forsa Aereu Pasífiku EUA, Ministru Defeza Filomeno Paixão no Komandante Jerál Falur Rate Laek hodi ofisialmente entrega aviaun ba vijilánsia Cessna 206 ba Governu Timor-Leste.

Serimónia entrega aviaun ne’e akontese iha loron 23 fulan-Juñu ho F-FDTL nia Komponente Aereu nia aniversáriu ba dalaruak.

Estadus Unidus orgullu ba parseria ho Timor-Leste, liuliu kona-ba domíniu seguransa marítima.

Aviaun vijilánsia Cessna 206 sei hasa’e Timor-Leste nia forsa defeza marítima nia abilidade vijilánsia ho signifikativu, asegura protesaun ba área territóriu no salfaguarda rekursu vital marítima nian ho ró patról Guardian Class husi Austrália ne’ebé sei to’o mai iha tinan oin. Liután ida ne’e, aviaun vijilánsia ida ne’e sei hala’o papél importante hodi fó espasu ba responde rápidu ba dezastre naturais, fasilidade esforsu asisténsia ho efisiénsia durante tempu krítika sira. 

“Serimónia entrega aviaun Cessna 206 ho sistema vijilánsia ne’e reprezenta rezultadu ba planeamentu entre nasaun rua ne’e. Iha tinan tolu nia laran ba kotuk, F-FDTL sira hala’o serbisu ne’ebé ezatamente di’ak tebes ho ami nia membru ekipa sira hodi asegura aviaun to’o ho seguru hala’o serbisu ho Cessna ne’e di’ak tebes ho sistema ISR ka sistema vijilánsia, intelejénsia no investigasaun ne’ebé mak daudaun ne’e ita haree iha ne’e,” dehan Enkarregadu Negósiu Tom Daley durante serimónia entrega refere. 

Entretantu, molok ne’e, iha tinan 2022, Estadus Unidus haruka ekipa ida kompostu pilotu no mekaniku sira husi F-FDTL no PNTL ba formasaun kona-ba aviaun Cessna 206 iha Estadus Unidus iha Massachusetts.

Enkuantu, Estadus Unidus ho Timor-Leste sei kontinua servisu hamutuk, fahe matenek no rekursu ba malu hodi responde ba dezafiu no promove estabildade rejionál.

“Estadus Unidus orgullu hala’o parseria ho Timor-Leste ho enfatiza kompromisu ba apoia nasaun ida ne’e nia soberania, seguransa no prosperiedade”.