“Iha Konstitusaun Repúblika (hatete) iha periodu Estadu Emerjénsia Prezidente Repúblika sei labele dizolve Parlamentu Nasionál, Prezidente Parlamentu nia deklarasaun ne’e hatudu momoos katak Prezidente Parlamentu la komprende konstitusaun tanba Prezidente Parlamentu haruka Prezidente Repúblika atu dizolve Parlamentu Nasionál iha periodu Estadu Emerjénsia,” dehan nia.

Kona-ba deklarasaun Prezidente PN ne’ebé rezeita rekerimentu destituisaun, Vasconcelhos konsidera nu’udar krime abuzu poder.

“Prezidente Parlamentu la tau ba ajenda liu tiha ona prazu ne’ebé mak iha rejimentu katak Prezidente Parlamentu sala, ne’e hatudu katak abuzu poder.”

Hatan ba deklarasaun husi Arão kona-ba karta ne’ebé dirije sala, Vasconcelhos dehan, deklarasaun ne’e hatudu mós katak Prezidente PN la komprende rejimentu PN.

Tanba, nia hatete, liu tiha loron lima maibé Prezidente PN la marka ajenda plenaria ba substitusaun meza ho nune’e bankada tolu halo fali pedidu rekerimentu ida husu Vise PN na’in rua atu lider, aplika artigu 22 pontu 1 rejimentu PN.

“Agora la aplika artigu 17, maibé agora aplika ona artigu 22 pontu 1, tanba ami hein loron plenária nian hodi Vise Parlamentu Nasionál lidera ba substitusaun meza parlamentu nasionál nian.”

Tuir rejimentu, nia hatete, bainhira Prezidente PN la ajenda, no karik Vise Prezidente PN mós iha impedimentu, bele husu deputadu ida ho idade boot liu iha PN atu dirije meza.

“Idade boot liu iha Parlamentu Nasionál mak deputadu L7 (tinan 74) bele lidera meza Parlamentu, ne’e rejimentu mak fó dalan,” dehan nia.