Foin lalais ne’e, Konsellu Ministru, bazeia ba pedidu husi PM Taur, halo alterasaun ba lei organika governu nian hodi hamosu Vise Primeiru Ministru na’in rua.

Diretór Ezekutivu FONGTIL, Daniel Santos do Carmo hatete, governu bele halo mudansa lei organiku, maibé tenke respeita konstituisaun RDTL.

“Politika iha mundu ne’e porsentu 99 ne’e la moos ida, porsentu 1 mak moos, tanba ne’e tama politika asegura barak liu mak interese. Ho ida ne’e mak kuandu iha politika ne’e oinsa atu asegura interese,” dehan Diretór ne’e iha Muzeu Rezistensia, Kinta (14/05).

Aleinde ne’e, Diretór ne’e dehan, atu hakotu impase politika iha Timor-Leste, lider sira presiza tuur hamutuk no koalia didi’ak ba malu.

“Sira bele rona no sira bele tuur atu diskute, maibé husi diskusaun katak saida mak sira halo politika buat prinsipal mak labele kontra ita-nia konstitusionál, hanesan lei inan.”

Tanba, nia hatete, bainhira kontra konstituisaun sei sai presedente la di’ak ba nia jerasaun tuir mai.

Nia husu ba PR Lu Olo atu tenke hatuur nia aan hanesan Xefe Estadu hodi resolve impase ne’ebé TL hasoru hela.

“Prezidente Repúblika tenke hatuur nia an hanesan Xefe Estadu atu rezolve problema hotu-hotu ne’ebé mak agora nasaun enfrenta bazeia ba konstitusaun haruka. Labele uza sentimentu politika, sentimentu partidaria no sentimentu privadu, maibé tenke foti sentimentu tuir konstitusaun haruka,” nia dehan.